Bizneset e dëmtuara nga protestat, qeveria nis procesin e kompensimit: Si funksionon “Dëmi im”

Bizneset e vogla që kanë pësuar dëme materiale gjatë protestave të ditëve të fundit në Tiranë mund të regjistrojnë humbjet e tyre përmes një shërbimi të posaçëm në e-Albania.

Kryeministri Edi Rama njoftoi këtë të shtunë ngritjen e mekanizmit “Dëmi im”, ndërsa 10 grupe të administratës tatimore janë angazhuar për verifikimin e dëmtimeve në terren.

Sipas procedurës së prezantuar nga qeveria, subjektet e prekura duhet të deklarojnë të dhënat identifikuese të biznesit, NIPT-in, vlerën e përafërt të dëmit dhe dokumentacionin që mbështet kërkesën.

Fotografitë, videot, faturat dhe dokumentet e tjera do të shërbejnë për të verifikuar dëmtimet e raportuara.

Kur do të jepen kompensimet?

Ministrja e Ekonomisë dhe Inovacionit, Delina Ibrahimaj, ka sqaruar se të dhënat e deklaruara online do të ballafaqohen me verifikimet e kryera në terren.

Pas këtij procesi pritet të përgatitet regjistri përfundimtar i bizneseve të prekura, mbi të cilin do të mbështetet procesi i ndihmës financiare.

Megjithatë, ende nuk është bërë publik një afat për përfundimin e kompensimeve dhe as shuma konkrete që do të përfitojë secili subjekt.

Nisma vjen pas dëmeve të shkaktuara në biznese dhe prona private gjatë përplasjeve të dhunshme që kanë shoqëruar protestat kundër qeverisë.

Për tregtarët e prekur, sfida e menjëhershme mbetet dokumentimi i humbjeve dhe rikthimi i aktivitetit, ndërsa efektiviteti i skemës së qeverisë do të varet nga shpejtësia e verifikimeve dhe realizimi i mbështetjes së premtuar.