PAS DYERVE TE ZYRES SE AGASIT/ ATY KU PARAKALONIN GJITHE MEKATARET E KRIMIT DHE SHTETIT

Një tjetër panoramë e rrjetit të pushtetit informal rreth Ergys Agasit vjen nga analisti Lorenc Vangjeli.

Në një intervistë televizive, Vangjeli deklaroi se zyra e Agasit ishte kthyer në një pikë takimi ku, sipas tij, ndërthureshin njerëz nga politika, drejtësia, policia dhe biznesi.

Ai tha se në atë zyrë kishin shkuar anëtarë të kabinetit qeveritar, deputetë, njerëz të sistemit të drejtësisë, drejtues të Policisë së Shtetit dhe biznesmenë.

Vangjeli e përshkroi këtë zyrë si një lloj “Meke” ku, sipas tij, nuk mblidheshin besimtarë, por persona me interesa të ndryshme.

“Një prej gjërave të njohura është që zyra e zotit Agasi ishte shndërruar në një lloj Meke në Tiranë, në të cilën kanë parakaluar, jo besimtarë, por mëkatarë kryesisht”, deklaroi ai.

Analisti përmendi më tej figura të ndryshme të institucioneve, duke pretenduar se në këtë ambient ishin shfaqur deputetë, zyrtarë të qeverisë, prokurorë, gjyqtarë, drejtues të lartë të Policisë së Shtetit dhe biznesmenë.

Sipas Vangjelit, në këtë panoramë përfshiheshin edhe dy kategori biznesmenësh: ata që kërkonin ndihmë për problemet e tyre dhe persona me të shkuar kriminale që, sipas tij, kishin hyrë në botën e biznesit.

“Biznesmenë të cilët në një moment të caktuar në punën e tyre u duhej ndihma e armëve, si dhe të tjerë të cilët kanë arritur në biznes, ndërkohë që zanat të parë kanë pasur armën”, tha Vangjeli.

Pikërisht këtu analisti ngre pikëpyetjen më të madhe: nga buronte fuqia që, sipas tij, kishte krijuar kjo zyrë?

Vangjeli deklaroi se nuk e di se nga vinte kjo fuqi, por pretendoi se zyra e Agasit ishte shndërruar në një vend ku, në momente të caktuara, “zgjidheshin probleme” për disa persona dhe krijoheshin probleme për të tjerë.

“Nuk e di nga vinte kjo, por unë di që ajo zyrë ishte shndërruar në një moment, zgjidhte probleme për ata që donin, apo krijonte probleme për të tjerët”, u shpreh ai.

Deklaratat vijnë në një kohë kur hetimet ndaj Agasit janë zgjeruar në disa drejtime dhe kanë prekur edhe struktura shtetërore. Sipas raportimeve mbi hetimin, dosja ka përfshirë zhvillime që lidhen me AKSHI-n, Policinë dhe më pas me ish-drejtuesen e SHISH-it, Vlora Hyseni.

Në këtë kontekst, pyetja që ngrihet nga deklaratat e Vangjelit është se si u krijua dhe si funksionoi ky rrjet kontaktesh dhe influence rreth Agasit – dhe nëse hetimet do të mund të zbardhin marrëdhëniet mes personave dhe institucioneve të përmendura.