Teherani konfirmon raportimet: Jemi të hapur për negociata me SHBA-të, por pa kërcënime

Presidenti i Iranit, Masoud Pezeshkian, ka deklaruar se Teherani është i gatshëm të shqyrtojë negociata me Shtetet e Bashkuara, me kusht që procesi të zhvillohet në një atmosferë pa kërcënime dhe pa kërkesa të paarsyeshme.
Në një deklaratë të publikuar pas kërkesave të disa qeverive mike në rajon, Pezeshkian tha se ka udhëzuar ministrin e Punëve të Jashtme të përgatisë terrenin për bisedime, nëse krijohen kushtet e duhura diplomatike.
“Negociatat duhet të jenë të drejta dhe të barabarta, të bazuara në parimet e dinjitetit, mençurisë dhe maturisë, dhe brenda kuadrit të interesave kombëtare”, theksoi presidenti iranian.
Deklarata vjen në një moment tensionesh të larta në Lindjen e Mesme dhe pas sinjaleve të fundit se Irani mund të jetë i gatshëm të pezullojë ose kufizojë programin e tij bërthamor në këmbim të një marrëveshjeje diplomatike.
Qëndrimi i Pezeshkianit shihet si një sinjal i kujdesshëm hapjeje ndaj diplomacisë, duke vendosur njëkohësisht vija të qarta të kuqe ndaj presionit dhe kërcënimeve nga Washingtoni.
Deri tani, nuk ka pasur një reagim zyrtar nga Shtëpia e Bardhë lidhur me deklaratën presidentit iranian.