Zhdukja e 2-vjeçares në Serbi/ Vuçiç jep lajmin e hidhur: E tërhoqën zvarrë me makinë dhe e hodhën në ujërat e zeza

Danka e vogël u zhduk më 26 mars teksa po luante para shtëpisë së saj në fshatin Bansko Polije, në Serbinë verilindore dhe presidenti serb Aleksandër Vuçiç njoftoi sot se vajza e vogël kishte vdekur.

Vdekja e saj u shkaktua nga dy punonjës të ujësjellësit, të cilët e tërhoqën zvarrë vogëlushen me makinën e tyre të shërbimit dhe më pas e hodhën trupin e saj të pajetë në një zonë të përdorur si deponi ilegale. Autorët janë arrestuar dhe kanë pranuar fajësinë, ka bërë të ditur presidenti i Serbisë.

Zhdukja e Dankës së vogël kishte mobilizuar autoritetet serbe, por edhe Interpolin pasi kishte dyshime se ajo ishte rrëmbyer nga shtetas të një shteti fqinj. Në Serbi, për herë të parë funksionoi sistemi i menjëhershëm i raportimit për zhdukjen e një të mituri (Amber Alert) dhe pati një reagim të madh nga publiku për përpjekjet e autoriteteve për të gjetur vendndodhjen e dyvjeçares Danka Ilic.

“Kemi një lajm të keq për vogëlushen nga Bori, Danka Ilic është vrarë”, tha Vuçiç. “Policia ka arrestuar dy personat që vranë Dankën dhe me sa kuptoj unë, të dy kanë pranuar krimin e tyre”, shtoi ai.

Presidenti serb u shpreh se policiai ka çuar dy të arrestuarit në vendin ku gjendej trupi i vajzës për konfirmime të mëtejshme. Vogëlushja ishte zhdukur para 10 ditësh teksa ishte me nënën e saj në qytetin e Borit.

“Ishim në Banjsko Polje për një shëtitje. Një moment ajo ishte atje dhe në momentin tjetër ajo ishte zhdukur”, rrëfeu nëna e 2-vjeçares.