Kreatina “armatos” qelizat kundër kancerit, studimi zbulon efektin te minjtë

Kreatina, e njohur si suplement për sportistët, ka treguar se mund të fuqizojë disa prej qelizave që organizojnë mbrojtjen imunitare kundër tumoreve. Në eksperimente me minj, studiuesit e Universitetit të Kalifornisë në Los Anxhelos, UCLA, vërejtën edhe ngadalësim të rritjes së melanomës. Efekti terapeutik te pacientët ende nuk është provuar.

Studimi, i publikuar në revistën shkencore “iScience”, përqendrohet te qelizat dendritike. Ato identifikojnë materialin tumoral dhe aktivizojnë limfocitet T, qelizat imunitare që sulmojnë kancerin.

Studiuesit zbuluan se kreatina ndihmon këtë proces duke mbështetur rezervat energjetike të qelizave dendritike. Kur u mungonte proteina që transporton kreatinën brenda tyre, këto qeliza aktivizoheshin më pak dhe kishin aftësi më të dobët për të nxitur përgjigjen e limfociteve T.

Në eksperimentin me minj me melanomë, injeksionet e përditshme të kreatinës ngadalësuan ndjeshëm rritjen e tumorit. Njëkohësisht, u shtuan numri dhe aktivizimi i qelizave dendritike brenda tij.

Analizat treguan se kreatina rriste nivelin e ATP-së, molekulës që furnizon qelizat me energji. Ky mekanizëm ndihmonte në ruajtjen e sinjaleve të nevojshme për aktivizimin e mbrojtjes imunitare.

Ekipi kreu edhe prova laboratorike me qeliza njerëzore. Në këto eksperimente, kreatina përmirësoi aktivizimin e qelizave dendritike dhe aftësinë e tyre për të stimuluar limfocitet T kundër një objektivi të lidhur me kancerin.

Sipas studiuesve, rezultatet hapin mundësinë për kërkime mbi përdorimin e kreatinës si mbështetje për imunoterapinë dhe për përmirësimin e vaksinave terapeutike që bazohen te qelizat dendritike.

Por kufiri i zbulimit mbetet i qartë: eksperimentet janë kryer te minjtë dhe në qeliza laboratorike, jo te pacientët me kancer. Studimi nuk provon se marrja e kreatinës si suplement parandalon apo shëron tumoret. Për të përcaktuar nëse ky mekanizëm sjell përfitim real te njerëzit, nevojiten prova klinike.