“Kemi qenë të pafuqishëm më parë”, Trump: Pasojat e tarifave s’do të jenë të lehta

Presidenti i SHBA Donald Trump ka paralajmëruar amerikanët se mund të përballen me vështirësi përpara se tarifat e tij të “ditës së çlirimit” të rivendosin fuqinë ekonomike të vendit.

Tarifat gjithëpërfshirëse të Trump për shumicën e partnerëve tregtarë të SHBA-së hynë në fuqi të enjten, duke bërë që bursa amerikane të pësojë rrëzimin e saj më të keq që nga pandemia COVID-19. Kina ka reaguar duke vendosur një taksë prej 34% për mallrat amerikane, me vendet e tjera që premtojnë gjithashtu hakmarrje.

Në një postim në platformën e tij “Truth Social” të shtunën, presidenti i SHBA-së i tha publikut amerikan që të “mbahet fort” në pritje të përgjigjes së komunitetit ndërkombëtar ndaj politikave të tij ekonomike.

“Nuk do të jetë e lehtë, por rezultati përfundimtar do të jetë historik”, këmbënguli Trump.

Tarifat përfaqësojnë “një revolucion ekonomik dhe ne do të fitojmë… do ta bëjmë Amerikën të madhe përsëri,” shtoi ai.

“Kina është goditur shumë më rëndë se SHBA-ja, madje as afër. Ata dhe shumë vende të tjera, na kanë trajtuar keq në mënyrë të paqëndrueshme. Ne kemi qenë të pafuqishëm, por jo më”, shkroi Trump, duke shpjeguar vendimin e tij.

Presidenti amerikan këmbënguli se administrata e tij “po rikthen vendet e punës dhe bizneset si kurrë më parë. Tashmë, më shumë se pesë trilion dollarë investime dhe po rritet me shpejtësi”.