Trump heq dorë nga bisedat në telefon me Putinin, dërgon raketa dhe predha artilerie në Ukrainë

Sipas Reuters, duke cituar zyrtarë amerikanë, SHBA-të kanë dërguar në Ukrainë predha artilerie 155 mm dhe raketa GMLRS, të cilat lëshohen nga sistemet HIMARS.
Sasia e saktë e municioneve dhe nëse ato kanë arritur tashmë në vijat e frontit nuk u zbulua nga burimet.
Ky zhvillim vjen pas komenteve të fundit nga Donald Trump, i cili deklaroi se ishte “shumë i zhgënjyer me sjelljen e Putinit” dhe se SHBA-të do të duhej të rifillonin furnizimet me armë në Ukrainë. Menjëherë pas komenteve të tij, Pentagoni konfirmoi se kishin filluar dërgesat e reja.
Një javë më parë, dërgesat ishin ndaluar me urdhër të Sekretarit të Mbrojtjes Pete Hegseth. Pentagoni më vonë e shpjegoi vendimin si pjesë të një shqyrtimi më të gjerë të ndihmës ushtarake amerikane për vendet e huaja.