Girona përmbys Barcelonën, goditje e rëndë për katalanasit në garën për titull, Reali i merr kreun

Girona shkaktoi një surprizë të madhe duke mposhtur 2-1 Barcelonën me përmbysje, në një ndeshje dramatike që u kushton shtrenjtë katalanasve në garën për titullin në LaLiga. Humbja vjen vetëm pak ditë pas disfatës së thellë 4-0 ndaj Atletico Madrid-t në Kupën e Mbretit dhe detyron ekipin e drejtuar nga Hansi Flick t’ia “dhurojë” kreun Real Madrid-it, që pas javës së 24-t ka dy pikë më shumë (60 kundrejt 58).

Barcelona ishte më kërkuese në pjesën e parë dhe krijoi disa raste të pastra. Raphinha goditi shtyllën me një tentativë nga distanca, ndërsa më pas katalanasit fituan penallti. Lamine Yamal mori përsipër ekzekutimin, por goditja e tij u ndal nga shtylla. Pak minuta më herët, braziliani kishte shpërdoruar edhe një tjetër rast të artë, duke e dërguar topin ngjitur me shtyllën.

Avantazhi erdhi në minutën e 60-të, kur pas një krosimi të saktë të Jules Kounde, Pau Cubarsi shënoi me kokë për 0-1. Reagimi i vendasve ishte i menjëhershëm: në minutën e 62-të, pas një pasimi të bukur të Vladyslav Vanat, Thomas Lemar barazoi rezultatin me një goditje të qetë brenda zonës.

Girona vazhdoi të rrezikonte, me Joel Roca-n që u ndal nga një pritje e shkëlqyer e portierit Joan Garcia. Në fund, presioni i vendasve u shpërblye me golin e fitores, duke vulosur përmbysjen 2-1. Në shtesë, Ronald Araujo ishte shumë pranë barazimit, por goditja e tij fluturoi pak mbi traversë, duke konfirmuar një mbrëmje zhgënjyese për Barcelonën.