8 minutat e Trump: Regjimi në Iran, grup me njerët të egër, të ashpër dhe të tmerrshëm

Presidenti i SHBA-së, Donald Trump, ka konfirmuar se Uashingtoni ka nisur “operacione të mëdha luftarake në Iran” për të eliminuar “kërcënimet e menjëhershme”. Republika Islamike më parë ka hedhur poshtë kërkesat e SHBA-së për të frenuar programin e saj bërthamor, të cilin thotë se shërben vetëm për qëllime paqësore.
Në një video tetëminutëshe të postuar të shtunën në Truth Social, Trump përshkroi një mori ankesash historike ndaj Teheranit, ndërsa e përshkroi “regjimin iranian” si “një grup të egër njerëzish shumë të ashpër dhe të tmerrshëm”, duke shtuar se “aktivitetet e tij kërcënuese rrezikojnë drejtpërdrejt Shtetet e Bashkuara, trupat tona, bazat tona jashtë shtetit dhe aleatët tanë në të gjithë botën”.
Presidenti amerikan përmendi dështimin e diplomacisë bërthamore si një shkak të drejtpërdrejtë për sulme të reja. “Në Operacionin “Midnight Hammer” qershorin e kaluar, ne zhdukëm programin bërthamor të regjimit në Fordow, Natanz dhe Isfahan”, tha ai. “Pas atij sulmi, ne i paralajmëruam ata që të mos rifillonin kurrë ndjekjen e armëve bërthamore dhe kërkuam vazhdimisht të bënim një marrëveshje. Ata thanë se donin ta bënin, por pastaj nuk e bënë.”
Grupi i armatosur i mbështetur nga Irani paralajmëron për ‘luftë të gjatë’ nëse SHBA-të sulmojnë Teheranin
Trump pohoi gjithashtu se Irani jo vetëm që vazhdoi të zhvillonte programin e tij bërthamor, por gjithashtu kishte punuar në “raketa me rreze të gjatë veprimi që mund të kërcënojnë miqtë dhe aleatët tanë në Evropë” dhe madje mund të arrinin deri në kontinentin amerikan. Tre burime të Reuters më parë hodhën dyshime nëse Irani ka një aftësi të tillë.
Presidenti amerikan tha gjithashtu se forcat amerikane do të “shkatërronin raketat [iraniane] dhe do të rrafshonin industrinë e tyre të raketave” , “do të shkatërronin marinën e tyre” dhe do të siguroheshin që Irani “të mos pajiset me armë bërthamore”, duke pranuar rrezikun e viktimave amerikane.
Trump e përfundoi fjalimin e tij duke i kërkuar ushtrisë iraniane të dorëzojë armët, duke paralajmëruar se përndryshe do të “përballeshin me vdekjen e sigurt”. Ai gjithashtu u bëri thirrje iranianëve të zakonshëm të “marrin kontrollin e qeverisë së tyre” pasi SHBA-të të përmbushin objektivat e tyre.
Irani pohon se nuk kërkon të pajiset me armë bërthamore, duke argumentuar se programi i tij atomik është vetëm për qëllime paqësore. Ai ka paralajmëruar gjithashtu se çdo sulm do të përballet me sulme hakmarrëse ndaj objekteve ushtarake amerikane në të gjithë Lindjen e Mesme.