Nga sot edhe 59 dite/ Kurti ngriti qeverine, por opozita mban çelesin per presidentin

Kosova ka tashmë Kuvend dhe Qeveri, por kriza politike nuk duket se ka marrë fund. Me 62 vota, Qeveria “Kurti 4” arriti të sigurojë shumicën parlamentare, por kjo shumicë nuk mjafton për zgjedhjen e Presidentit.

Dhe pikërisht këtu nis kapitulli i ri i përplasjes politike.

Kuvendi është shpallur i konstituuar nga kryetarja Albulena Haxhiu, edhe pse ende nuk është zgjedhur nënkryetari nga radhët e PDK-së. Por përfundimi i betejës për formimin e Qeverisë ka aktivizuar menjëherë një tjetër afat kushtetues: atë për zgjedhjen e kreut të shtetit.

Matematika parlamentare është tashmë më e ndërlikuar.

Në dy raundet e para për zgjedhjen e Presidentit nevojiten 80 vota, ndërsa në raundin e tretë kërkohen të paktën 61. Por përtej numrit të votave, një tjetër problem është pjesëmarrja e deputetëve, pa të cilën procesi nuk mund të zhvillohet.

Kjo e bën të domosdoshëm bashkëpunimin me opozitën.

Pas konstituimit të Kuvendit ka nisur numërimi mbrapsht i 60 ditëve. Nëse Presidenti nuk zgjidhet brenda këtij afati, Kuvendi shpërndahet dhe Kosova rikthehet në zgjedhje.

Zgjedhjet e reja duhet të mbahen jo më vonë se 45 ditë pas shpërndarjes së Kuvendit.

Ky skenar ka ndezur edhe debatet politike në Prishtinë. Nga opozita është ngritur pretendimi se zvarritja e konstituimit të Kuvendit mund të ketë qenë pjesë e një skenari për ta çuar vendin në zgjedhje në fund të dhjetorit.

Në këtë kuadër është përmendur edhe data 27 dhjetor, një periudhë kur një pjesë e madhe e diasporës ndodhet në Kosovë. Kjo mund të ishte politikisht e favorshme për Lëvizjen Vetëvendosje, e cila në zgjedhjet e fundit mori një përqindje më të lartë të votave nga jashtë vendit.

Megjithatë, 27 dhjetori nuk është një datë e përcaktuar. Është një skenar politik. Kushtetuta përcakton një afat maksimal prej 45 ditësh pas shpërndarjes së Kuvendit dhe jo detyrimin për të pritur deri në ditën e fundit.

Ndërkohë, 62 votat që siguruan Qeverinë nuk janë të mjaftueshme për të garantuar Presidentin.

Është përmendur mundësia e një marrëveshjeje me LDK-në për kandidaturën e Bekim Sejdiut, por brenda kësaj partie ka deputetë që kanë shprehur kundërshtime.

Në anën tjetër, PDK-ja ka paralajmëruar dërgimin në Gjykatën Kushtetuese të mënyrës se si është përmbyllur konstituimi i Kuvendit.

Dhe vendimi i Kushtetueses mund të bëhet një tjetër pikë kthese në këtë krizë.

Pra, votimi i Qeverisë nuk e mbylli krizën politike në Kosovë.

Vetëm e zhvendosi atë.

Albin Kurti tashmë ka Qeverinë dhe një shumicë minimale parlamentare. Por për të zgjedhur Presidentin do t’i duhet diçka që nuk i është dashur për formimin e kabinetit: kompromisi me opozitën.

Nëse kompromisi nuk arrihet brenda 60 ditëve, Kuvendi që sapo u konstituua mund të shkojë drejt shpërndarjes dhe Kosovës mund t’i duhet të rikthehet edhe një herë te kutitë e votimit.

Një tjetër krizë, një tjetër numërim mbrapsht dhe një tjetër betejë për pushtetin.

Kosova duket se po bën sërish një hap përpara dhe dy hapa pas.