Ballkani është fuçi baruti/ Kongresi amerikan ngre alarmin për vendimin e Hagës ndaj Thaçit

Kongresmeni amerikan Keith Self ka ngritur shqetësime lidhur me ndikimin e mundshëm të paragjykimeve politike në vendimmarrjen e institucioneve të drejtësisë në Hagë, në prag të vendimit në çështjen ndaj ish-presidentit të Kosovës, Hashim Thaçi, dhe tre ish-krerëve të tjerë të Ushtrisë Çlirimtare të Kosovës (UÇK).

Në një postim në platformën X, Self ka thënë se një temë që, sipas tij, po përsëritet në rastet që dalin nga Haga është lejimi i paragjykimeve politike për të ndikuar në vendimmarrje.

“Shpresoj që një paragjykim i tillë të mos shfaqet këtë javë, kur të shpallet vendimi në gjyqin ndaj Hashim Thaçit dhe tre civilëve shqiptarë që luftuan për pavarësi pas vitesh të tëra shtypjeje serbe”, ka shkruar kongresmeni amerikan.

Self e ka lidhur këtë çështje edhe me situatën e brishtë politike dhe të sigurisë në Ballkan, duke e përshkruar rajonin si “një kuti baruti”.

“Ballkani është një kuti baruti, në një rajon ku regjimet shtypëse nuk do të donin asgjë më shumë sesa të ndezin flakët e përçarjes, në vend që të punojnë drejt pajtimit”, ka deklaruar ai.

Reagimi i plotë i Keith Self:

“Një temë e vazhdueshme që po del nga Haga duket se është lejimi i paragjykimeve politike për të ndikuar në vendimet e tyre.

Shpresoj që një paragjykim i tillë të mos shfaqet këtë javë, kur të jepet një vendim në gjyqin e Hashim Thaçit dhe tre civilëve shqiptarë që luftuan për pavarësi pas viteve të shtypjes serbe.

Ballkani është një kuti baruti, në një rajon ku regjimet shtypëse nuk do të donin asgjë më shumë sesa të nxisin flakët e përçarjes, në vend që të punojnë drejt pajtimit.”