81 vite burg për ish krerët e UÇK-së/ Veteranët: Turp për drejtësinë ndërkombëtare

Organizata e Veteranëve të Luftës së UÇK-së ka reaguar pas dënimit të katër ish-krerëve të Ushtrisë Çlirimtare të Kosovës nga Gjykata Speciale në Hagë, duke kundërshtuar vendimin.

Në reagimin e tyre, veteranët shprehen se e hedhin poshtë dënimin e Hashim Thaçit, Kadri Veselit, Rexhep Selimit dhe Jakup Krasniqit. Ata e cilësojnë aktgjykimin si një goditje ndaj luftës së UÇK-së dhe deklarojnë se vendimi nuk mund të ndryshojë atë që ata e konsiderojnë si historinë e luftës çlirimtare të Kosovës.

Sipas organizatës, UÇK-ja ishte pjesë e rezistencës së organizuar të shqiptarëve të Kosovës dhe sakrifica e pjesëtarëve të saj kontribuoi, sipas tyre, në krijimin e shtetësisë së Kosovës.

Veteranët deklarojnë gjithashtu se që në fillim e kanë kundërshtuar Gjykatën Speciale dhe e kanë konsideruar atë një proces politik. Ata e cilësojnë vendimin si “turp për drejtësinë ndërkombëtare” dhe shprehen se asnjë vendim gjyqësor nuk mund ta ndryshojë, sipas tyre, të vërtetën historike mbi luftën e UÇK-së.

“E hedhim poshtë kategorikisht dënimin e Hashim Thaçit, Kadri Veselit, Rexhep Selimit dhe Jakup Krasniqit. Ky aktgjykim godet luftën e drejtë çlirimtare të UÇK-së dhe lëndon çdo familje që dha bijtë dhe bijat për lirinë e Kosovës”, thuhet në reagim.