Thaçi kundër vendimit të Hagës, vjen reagimi i parë: Do ta apelojmë vendimin

Ekipi mbrojtës i ish-presidentit të Kosovës, Hashim Thaçi, ka njoftuar se do të ankimojë vendimin e Dhomave të Specializuara në Hagë, përmes të cilit ai u dënua me 25 vite burgim.

Në një deklaratë të bërë publike nga avokati kryesor Luka Mišetić, mbrojtja e Thaçit argumenton se aktgjykimi përmban, sipas saj, gabime ligjore dhe faktike, si dhe shkelje procedurale që, në vlerësimin e saj, kanë ndikuar në paanësinë e procesit gjyqësor.

Përmes avokatit të tij, Thaçi ka falënderuar qytetarët e Kosovës dhe mbështetësit ndërkombëtarë për reagimet pas vendimit dhe u ka bërë thirrje qytetarëve të ruajnë qetësinë dhe të reagojnë në mënyrë paqësore.

Mbrojtja pretendon gjithashtu se gjatë procesit gjyqësor trupi gjykues ka tejkaluar, sipas saj, kufijtë e një qasjeje neutrale në administrimin e provave dhe marrjen në pyetje të dëshmitarëve. Një nga çështjet e ngritura nga avokati Mišetić lidhet me rastin e Behajdin Allaqit.

Sipas mbrojtjes, trupi gjykues në shpalljen e vendimit e ka lidhur Thaçin me vrasjen e Allaqit, ndërkohë që, sipas avokatit, më herët ishte vendosur që çështja dhe provat përkatëse të trajtoheshin në mënyrë konfidenciale. Mbrojtja argumenton se kjo e ka kufizuar mundësinë e shqyrtimit publik të provave mbi të cilat është mbështetur ky konstatim.

Reagimi i plotë:

“Hashim Thaçi dëshiron të shprehë vlerësimin e tij më të sinqertë për mbështetjen e madhe që ai, Kadri Veseli, Rexhep Selimi dhe Jakup Krasniqi kanë marrë nga populli i Kosovës dhe në nivel ndërkombëtar, si dhe u bën thirrje qytetarëve të Kosovës të ruajnë qetësinë përballë padrejtësisë së djeshme.

Avokatët e z. Thaçi do ta apelojnë vendimin e djeshëm të Trupit Gjykues përpara Panelit të Apelit të Dhomave të Specializuara të Kosovës (DHSK), duke pretenduar gabime të rënda ligjore dhe faktike që cenuan drejtësinë e procedurave.

Gjatë gjithë gjykimit, Mbrojtja ka ngritur në mënyrë të përsëritur shqetësime lidhur me drejtësinë procedurale, përfshirë fushatën e gjerë të marrjes në pyetje të kryer drejtpërdrejt nga anëtarët e Trupit Gjykues në një mënyrë që nuk krijonte pamjen e paanësisë. Mbrojtja mbron qëndrimin se ndërhyrjet gjyqësore kaluan kufirin e kërkimit neutral të së vërtetës, duke komprometuar pamjen e paanësisë që kërkohet sipas standardeve ndërkombëtare të drejtësisë. Kjo mungesë e paanësisë tani përshkon të gjithë vendimin e Trupit Gjykues.

Mbrojtja parashtron se konstatimet e Trupit Gjykues për fajësi ‘tej dyshimit të arsyeshëm’ bazohen në prova të pamjaftueshme dhe të pakonfirmuara. Për më tepër, Trupi Gjykues dje deklaroi publikisht se z. Thaçi ishte i përfshirë në vrasjen e Behajdin Allaqit, pasi më parë kishte urdhëruar të gjitha palët në çështje që të mos e diskutonin rastin e z. Allaqi në seancë publike në gjykatë, dhe pasi kishte urdhëruar që të gjitha provat lidhur me këtë rast të mbaheshin konfidenciale. Trupi Gjykues kështu e ka dënuar publikisht z. Thaçi për një vrasje, ndërkohë që provat mbi të cilat mbështeti këtë përfundim i mbajti të mbrojtura nga ekzaminimi publik. Z. Thaçi do ta mirëpriste një ekzaminim të tillë publik të provave. Mbrojtja do t’i apelojë vendimet e Trupit Gjykues për shkeljen e të drejtave të tij themelore për një proces të rregullt gjyqësor sipas Konventës Evropiane për të Drejtat e Njeriut dhe Kushtetutës së Kosovës. Z. Thaçi mohon kategorikisht çdo përfshirje në vrasje.

Respektimi i standardeve rigoroze të drejtësisë procedurale është jetik për ruajtjen e besimit të publikut te institucionet ndërkombëtare penale. Mbrojtja do të dorëzojë zyrtarisht Njoftimin për Apelim për të korrigjuar këto gabime faktike, ligjore dhe procedurale përpara Panelit të Apelit.”