Bota në alarm për naftën/ Macron dërgon trupa në Arabinë Saudite: Do ta mbrojmë

Franca do të dërgojë trupa, radarë dhe sisteme të mbrojtjes ajrore në Arabinë Saudite për të mbrojtur portin strategjik të Yanbu, njoftoi presidenti Emmanuel Macron.

“Do të dërgojmë mjete ushtarake, domethënë ushtarë, sisteme radarësh dhe sisteme mbrojtëse, për të mbrojtur këtë zonë”, tha Macron gjatë një interviste televizive.

Presidenti francez theksoi se misioni synon mbrojtjen e infrastrukturës dhe jo përfshirjen e Francës në konflikt.

Sipas informacionit të cituar nga Macron, Yanbu është përballur së fundmi me sulme nga lëvizja Houthi e Jemenit, e mbështetur nga Irani.

Sipas raportimeve, kompania shtetërore Saudi Aramco ka pezulluar dërgesat drejt rafinerive evropiane për shkak të situatës së sigurisë.

Njoftimi i Macron vjen ndërsa rreziku i ndërprerjeve të furnizimit përmes Hormuzit po rrit shqetësimin në Evropë për çmimet dhe disponueshmërinë e energjisë.

Një pjesë e konsiderueshme e intervistës së presidentit francez u përqendrua pikërisht te siguria energjetike dhe mundësia që përkeqësimi i situatës ndërkombëtare të prekë furnizimet përpara dimrit.

Macron u përpoq të siguronte publikun francez se vendi ka rezerva të mjaftueshme. Ai tha se qeveria po merr masa për të shmangur ndërprerjet në furnizimin me naftë, gaz natyror dhe karburant për aviacionin.