Kronike
KOKAINË DHE PASAPORTË ITALIANE FALSE, TRE SHQIPTARË DËNOHEN NË BRITANI
Në qershor, policia britanike kapi Hysen Sopikun dhe Alvaro Vrapin teksa shisnin drogë nga një Nissan Qashqai. Në dy vende pranë qytetit Chippenham, ku të rinjtë kishin qenë po atë ditë, oficerët gjetën drogë me vlerë mbi 11 mijë paund. Të dy tashmë janë dënuar me burg nga Gjykata e Kurorës në Swindon.
Hysen Sopiku, 21 vjeç, mori dënimin më të rëndë, tre vjet burg. Ai pranoi se ishte përfshirë në shpërndarjen e drogës dhe se mbante kokainë për shitje. Alvaro Vrapi, 18 vjeç, u dënua me 28 muaj burg për përfshirje në shpërndarjen e drogës dhe mbajtje dokumentesh të rreme identiteti. Sipas policisë, Vrapi kishte përdorur dokumente false për të hapur llogari bankare që i shërbenin grupit.
Daniela Sopiku, 26 vjeçe, u arrestua po atë ditë në lagjen Old Town të Swindonit. Gjatë kontrolleve, policia gjeti para në dorë dhe një pasaportë italiane të falsifikuar në emrin e saj. Më 19 nëntor, gjykata e dënoi me nëntë muaj burg për dokumentet e rreme dhe për pasurinë me origjinë kriminale që ajo kishte përfituar dhe përdorur.
Hetimi përfshiu shpërndarjen e kokainës në disa qytete të Wiltshire gjatë viteve 2025 dhe 2026. Nga verifikimet financiare, policia identifikoi mbi 53 mijë paund të ardhura me burim të pashpjeguar për të tre së bashku.