‘Tërmeti’ në drejtësi/ Shkarkohet nga detyra Kryeprokurori i Speciales në Kosovë

Këshilli Prokurorial i Kosovës ka vendosur të largojë Blerim Isufajn nga pozita e Kryeprokurorit të Prokurorisë Speciale të Republikës së Kosovës. Vendimi u mor të premten, më 2 tetor, në një mbledhje të jashtëzakonshme të KPK-së.

Pas largimit nga posti drejtues, Isufaj do të vijojë të ushtrojë funksionin e prokurorit në Prokurorinë Speciale. Në vend të tij, KPK ka caktuar prokurorin Dren Paca si ushtrues detyre të Kryeprokurorit, deri në përfundimin e procedurave ligjore për plotësimin e pozitës.

Sipas KPK-së, vendimi është marrë pas shqyrtimit të çështjes dhe vlerësimit të rrethanave institucionale dhe profesionale, në mbështetje të kompetencave ligjore të Këshillit.

Në komunikatën e tij, KPK përmend si arsye keqmenaxhimin e Prokurorisë Speciale, vlerësimin për mungesë kompetence në ushtrimin e funksionit drejtues, mospërmbushjen e detyrave dhe përgjegjësive ligjore, si dhe mosarritjen e standardeve të kërkuara të performancës. Këshilli thotë se këto përfundime lidhen me vlerësimin e performancës dhe nuk përbëjnë, sipas tij, konsiderata politike.

Vendimi vjen pas debateve të zhvilluara në KPK lidhur me efikasitetin e Prokurorisë Speciale. Një ditë më herët, raportimet mbi një vlerësim krahasues të efikasitetit për periudhën 2023–2025 kishin nxitur debat brenda Këshillit.

KPK ka deklaruar se synon të rikthejë efikasitetin institucional dhe të forcojë kapacitetet profesionale e menaxheriale të Prokurorisë Speciale, me fokus të veçantë në luftën kundër krimit të organizuar dhe transnacional.