Kremlini ndez sërish retorikën për Kosovën: Zakharova akuzon Perëndimin për spastrim etnik

Në një deklaratë të publikuar nga diplomacia ruse, Zakharova ka akuzuar institucionet e Kosovës për atë që ajo e përshkroi si “shtypje mbi baza etnike” ndaj komunitetit serb. Ajo ka pretenduar gjithashtu se kjo situatë po zhvillohet përballë misioneve ndërkombëtare dhe me, sipas saj, “miratim të heshtur” të NATO-s, Bashkimit Evropian dhe Kombeve të Bashkuara.

Zyrtarja ruse ka përdorur një gjuhë veçanërisht të ashpër për situatën në Kosovë, duke e cilësuar gjendjen e serbëve si “vërtet katastrofike”. Ajo ka përsëritur pretendimet se pjesëtarë të komunitetit serb po detyrohen të largohen nga shtëpitë e tyre, ndërsa ka akuzuar institucionet e drejtësisë në Kosovë për “sajime masive” të procedurave penale dhe për veprime që, sipas saj, synojnë frikësimin.

Zakharova ka ngritur akuza edhe për përdorim, siç pretendon ajo, “qartësisht joproporcional të forcës, deri në torturë”, duke përmendur ndër të tjera edhe rrënimin e objekteve pa leje në zonën e Ujmanit.

Në shënjestër të deklaratave të saj ka qenë edhe kryeministri i Kosovës, Albin Kurti. Zakharova e ka akuzuar atë për “serbofobi fanatike dhe të pakontrolluar”, duke e lidhur diskursin e tij politik me qëndrime kundër komunitetit serb.

Pjesën më të ashpër të deklaratës së saj, megjithatë, Zakharova e ka drejtuar ndaj vendeve perëndimore. Ajo ka pretenduar se, përmes asaj që e cilëson si “mosveprim”, Perëndimi po inkurajon atë që ajo e quan “spastrim etnik të Kosovës”.

Deklaratat e Moskës vijnë në linjë me qëndrimin tradicional rus ndaj Kosovës dhe përputhen me narrativën e Beogradit, i cili prej vitesh akuzon institucionet e Kosovës për diskriminim dhe presion ndaj serbëve.

Rusia nuk e njeh pavarësinë e Kosovës dhe vazhdon ta mbështesë Serbinë në forumet ndërkombëtare, përfshirë Këshillin e Sigurimit të OKB-së.

Në këtë kontekst, deklaratat e fundit të Zakharovës shërbejnë edhe si një tjetër dëshmi e qëndrimit të Kremlinit ndaj Kosovës, me Moskën që vazhdon ta përdorë çështjen e Kosovës si pjesë të përplasjes së saj politike dhe diplomatike me Perëndimin.