“Mos prisni deri në vdekjen e një magjistrati tjetër”/ Prokurorët dalin me 5 KËRKESA për qeverinë

Një vit pas vrasjes së gjyqtarit Astrit Kalaja në sallën e gjyqit, organizatat përfaqësuese të gjyqtarëve dhe prokurorëve i kanë kërkuar institucioneve shtetërore marrjen e masave konkrete për forcimin e sigurisë në institucionet e drejtësisë dhe për trajtimin institucional të familjes së tij.

Në një deklaratë të përbashkët, Unioni i Gjyqtarëve, Shoqata Kombëtare e Gjyqtarëve dhe Shoqata e Prokurorëve të Shqipërisë kërkojnë që Astrit Kalajës t’i njihet statusi “Dëshmor i Atdheut”, ndërsa familjes dhe fëmijëve të tij t’u garantohet një trajtim institucional dinjitoz.

Organizatat kërkojnë gjithashtu krijimin e një strukture të posaçme policore për sigurinë e gjykatave dhe prokurorive. Sipas tyre, nevojitet edhe ngritja e një mekanizmi të posaçëm për vlerësimin e kërcënimeve dhe mbrojtjen e magjistratëve të rrezikuar, si dhe të familjeve të tyre.

Një tjetër kërkesë lidhet me miratimin e një kuadri ligjor gjithëpërfshirës për garantimin e sigurisë në institucionet e drejtësisë.

“Një vit pas vrasjes së gjyqtarit Astrit Kalaja në sallën e gjyqit, përkujtimi kërkon përgjigje dhe veprime konkrete nga institucionet”, thuhet në deklaratën e përbashkët.

Në nje deklaratë të përbashkët, Unioni i Gjyqtarëve, Shoqata Kombëtare e Gjyqtarëve dhe Shoqata e Prokurorëve kërkojnë, pa vonesa të mëtejshme:

• Njohjen e statusit “Dëshmor i Atdheut” për gjyqtarin Astrit Kalaja.

• Garantimin e një trajtimi institucional dinjitoz për familjen dhe fëmijët e tij.

• Krijimin e një strukture të posaçme policore për sigurinë e gjykatave dhe prokurorive.

• Ngritjen e një mekanizmi efektiv për vlerësimin e kërcënimeve dhe mbrojtjen e magjistratëve të kërcënuar dhe familjeve të tyre.

• Miratimin e një kuadri ligjor gjithëpërfshirës për sigurinë e institucioneve të drejtësisë.

Siguria e magjistratëve është garanci për çdo qytetar që kërkon drejtësi pa frikë dhe pa presion. Mbrojtja e tyre dhe e institucioneve ku ushtrojnë detyrën është përgjegjësi e shtetit dhe investim për të gjithë shoqërinë.

Shteti nuk duhet të presë humbjen e një tjetër magjistrati për të vepruar”, shkruhej në njoftimin e Shoqatës së Prokurorëve të Shqipërisë.