ODIHR i tërheq vëmendjen policisë: Jemi të shqetësuar nga raportimet për dhunë…

Zyra për Institucione Demokratike dhe të Drejtat e Njeriut e OSBE-së, ODIHR, ka reaguar pas raportimeve për dhunë gjatë protestave në Shqipëri, duke u bërë thirrje të gjitha palëve të ruajnë paqen dhe të shmangin përshkallëzimin e situatës.

Në reagimin e saj publik, organizata thekson se forcat e rendit duhet të shmangin përdorimin e paligjshëm ose joproporcional të forcës ndaj protestuesve. ODIHR kërkon gjithashtu që çdo rast i dyshuar i përdorimit të paligjshëm të forcës të hetohet menjëherë dhe në mënyrë të pavarur.

“Të shqetësuar nga raportimet për dhunë gjatë protestave në #Shqipëri, ODIHR u bën thirrje të gjitha palëve të ruajnë paqen. Forcat e rendit duhet të shmangin përdorimin e paligjshëm ose joproporcional të forcës ndaj protestuesve, ndërsa çdo rast i përdorimit të paligjshëm të forcës duhet të hetohet menjëherë dhe në mënyrë të pavarur”, thuhet në deklaratë.

Reagimi vjen në një moment kur protestat dhe përplasjet mes protestuesve dhe policisë kanë ngritur shqetësime për respektimin e të drejtave të njeriut, proporcionalitetin e ndërhyrjeve policore dhe garantimin e së drejtës për tubim paqësor. Apeli i ODIHR-it vë në fokus si përgjegjësinë e forcave të rendit për të vepruar në përputhje me standardet ligjore, ashtu edhe nevojën që të gjitha palët të shmangin dhunën.