‘8.5 milionë lekë për kompaninë e Beqirit’/ Berisha akuzon Ramën

Kreu i Partisë Demokratike, Sali Berisha, ka rikthyer në vëmendje çështjen e biznesmenit Ermal Beqiri, i arrestuar në Francë pas shpalljes në kërkim ndërkombëtar nga SPAK, duke hedhur akuza ndaj qeverisë për mënyrën se si është trajtuar rasti i tij.

Në një deklaratë për mediat, Berisha pretendoi se pasuritë e Beqirit nuk janë sekuestruar dhe se kompania e tij ka vijuar të përfitojë pagesa nga institucionet publike. Sipas tij, bëhet fjalë për një pagesë prej 8.5 milionë lekësh për kompaninë e biznesmenit.

Kreu i PD-së akuzoi kryeministrin Edi Rama se po mbron interesat e Beqirit dhe e cilësoi këtë si një tregues të lidhjeve mes politikës dhe krimit.

“Krimi dhe shteti janë një dhe të pandarë”, deklaroi Berisha, duke pretenduar se Beqiri, pavarësisht akuzave penale ndaj tij, vijon të ketë mbështetje financiare përmes kompanive të lidhura me të.

Berisha kërkoi gjithashtu reagim nga institucionet e drejtësisë, duke kritikuar mungesën e masave ndaj pasurive dhe bizneseve që, sipas tij, lidhen me persona nën hetim ose në kërkim.

Gjatë deklaratës, ai përmendi edhe raste të tjera që sipas tij tregojnë mungesë ndërhyrjeje ndaj pasurive të personave të akuzuar për veprimtari kriminale.

Akuzat e Berishës vijnë pas arrestimit në Francë të Ermal Beqirit, ndaj të cilit SPAK ka zhvilluar hetime dhe ka kërkuar arrestimin në kuadër të një procedimi penal. Çështja vijon të jetë nën hetim nga autoritetet kompetente.