Arrestimi i Aco Gjukanoviç ndryshon lojën/ A po mbyllet epoka e pandëshkueshmërisë në Mal të Zi?

Nga perandoria financiare te hetimi penal; a po mbyllet epoka e pandëshkueshmërisë në Mal të Zi?
Arrestimi i Aco Gjukanoviç, biznesmenit të njohur dhe vëllait të ish-presidentit malazez Milo Gjukanoviç, përbën një nga zhvillimet më të bujshme në Mal të Zi vitet e fundit. Aksioni policor, i shtrirë në Podgoricë dhe Nikshiç, përfshiu kontrolle disaorëshe në pronat e tij, ku sipas raportimeve mediatike u sekuestruan armë zjarri, municion dhe pajisje që dyshohet se mbaheshin në kundërshtim me ligjin. Ai u ndalua dhe u dërgua për procedura të mëtejshme hetimore, ndërsa autoritetet po verifikojnë dokumentacionin e konfiskuar.

Por çështja nuk është thjesht penale. Aco Gjukanoviç nuk është një emër i zakonshëm në Mal të Zi. Ai konsiderohet një nga njerëzit më të pasur në vend, me ndikim të fortë në sektorin financiar, veçanërisht përmes aksioneve në Prva Banka Crne Gore, bankë që prej vitesh ka qenë në qendër të debatit publik dhe kritikave për lidhjet e saj me elitën politike. Gjatë periudhës së gjatë të dominimit politik të vëllait të tij, emri i Aco-s shpesh përmendej si simbol i ndërthurjes së pushtetit politik me kapitalin privat; një model tipik i tranzicionit post-jugosllav.

Arrestimi i tij vjen në një moment kur Mali i Zi përpiqet të forcojë kredencialet e shtetit ligjor përballë Bashkimit Europian dhe partnerëve perëndimorë. Për shumë analistë, ky veprim shihet si një test i vërtetë për institucionet e drejtësisë: a kemi të bëjmë me një hetim të pavarur që prek edhe figurat e paprekshme të së kaluarës, apo me një lëvizje të motivuar nga balancat e reja politike në Podgoricë?