Nga Presidenti lokal i Nxënësve te “Qytetar Nderi” në moshën 15-vjeçare/ Krenar Dunga, zëri i të gjithë nxënësve të Kamzës

Krenar Dunga është një prej të rinjve që ka zgjedhur ta kthejë angazhimin në komunitet në një rrugëtim konkret në lidership. Në moshën 16-vjeçare, ai mban disa role përfaqësuese, mes tyre President i Nxënësve të Kamzës, Kryetar për Shkencat në Parlamentin e Nxënësve të Shqipërisë, Deputet Rinor i zonës së Kamzës dhe Kryetar i Komisionit të Shkencës, Robotikës dhe Inovacionit.

Rrugëtimi i tij është shoqëruar me disa vlerësime institucionale, ndër të cilat spikatin titulli “Zëri i Qytetit” dhe nderimi me titullin “Qytetar Nderi”, i dhënë nga Bashkia Kamëz në moshën 15-vjeçare, në vlerësim të arritjeve, angazhimit dhe përfaqësimit të nxënësve të Kamzës. Për Dungën, këto role janë mbi të gjitha një përgjegjësi për të përcjellë zërin e nxënësve dhe për ta kthyer përfaqësimin në veprim konkret.

Një pjesë e rëndësishme e veprimtarisë së tij lidhet me shkencën, teknologjinë, robotikën dhe inovacionin. Paralelisht, ai është angazhuar edhe në iniciativa ndërgjegjësuese në fushën e shëndetësisë, përfshirë sensibilizimin e nxënësve për HPV-në dhe rëndësinë e edukimit shëndetësor në shkolla. Krahas angazhimit publik, Dunga ka një ambicie të qartë akademike: të ndjekë rrugën e mjekësisë dhe të specializohet në kardiologji.

Ai e sheh arsimin, shkencën dhe shërbimin ndaj komunitetit si pjesë të një vizioni të vetëm për të ardhmen. Përtej titujve dhe vlerësimeve, Krenar Dunga synon të ndërtojë një qasje ku zëri i të rinjve nuk mbetet vetëm simbolik, por shndërrohet në ide, iniciativa dhe ndryshime konkrete. Për të, ky është vetëm fillimi i një rrugëtimi më të gjatë në lidershipin rinor.