Kthimi i Ramës nga SHBA/ Salianji: A do lajmërojë dorëheqjen?

Ish-deputeti i Partisë Demokratike, Ervin Salianji, ka kërkuar dorëheqjen e kryeministrit Edi Rama, ndërsa ky i fundit pritet t’u drejtohet shqiptarëve pas kthimit nga Shtetet e Bashkuara.

Në reagimin e tij, Salianji akuzon qeverinë për përgjegjësi politike lidhur me situatën e krijuar pas hetimeve ndaj ish-drejtueses së SHISH dhe ngre akuza për mënyrën e funksionimit të institucioneve shtetërore.

“A do të mbajë më në fund përgjegjësi për shkatërrimin e shtetit? Për kthimin e institucioneve në shërbim të krimit, për kapjen e institucioneve të sigurisë kombëtare, për korrupsionin masiv, për emërimet dhe delegimin e autoritetit shtetëror tek gysrat e grupet kriminale?!”, shkruan ish-deputeti.

Salianji ka komentuar edhe vizitën e Ramës në SHBA, duke pretenduar se kryeministri është përballur me mungesë takimesh të nivelit të lartë dhe se aktivitetet e tij janë shoqëruar kryesisht nga pjesëtarë të administratës shqiptare.

“Asnjë takim bilateral i nivelit të lartë, asnjë takim që të dëshmonte peshën që pretendon se ka Edi Rama, ndërsa aktivitetet e tij shoqëroheshin kryesisht nga njerëzit e administratës shqiptare”, shprehet Salianji.

Postimi i Salianjit

A do lajmërojë dorëheqjen Edi Rama tek konferenca urgjente ne aeroport?

A do të mbajë më në fund përgjegjësi për shkatërrimin e shtetit? Për kthimin e institucioneve në shërbim të krimit, për kapjen e institucioneve të sigurisë kombëtare, për korrupsionin masiv, për emërimet dhe delegimin e autoritetit shtetëror tek gysrat e grupet kriminale?!

Skandali me drejtuesen e ShISH nuk është thjesht një dështim i qeverisë, është shembja e shtetit përballë krimit!

A ka ndikuar që në New York pamë edhe një tjetër realitet: braktisjen politike dhe diplomatike të Edi Ramës.

Asnjë takim bilateral i nivelit të lartë, asnjë takim që të dëshmonte peshën që pretendon se ka Edi Rama, ndërsa aktivitetet e tij shoqëroheshin kryesisht nga njerëzit e administratës shqiptare.

Sot Shqipëria pret dorëheqjen dhe jo fshehjen pas propagandës, ndërsa krimi dikton shtetin dhe institucionet bien njëra pas tjetrës!

Apo do të bëjë Rama të vetmen gjë që i ka mbetur përballë kësaj katastrofe politike: TË JAPË DORËHEQJEN?!

Shqipëria nuk mund të vazhdojë të qeveriset si pronë private.