Tare zbulon pesë goditjet që nuk u realizuan: Milani mund të kishte një tjetër skuadër

Tashmë analist i Champions League në emisionin e Top Channel kushtuar kompeticionit më të rëndësishëm europian për klube, Tare është ndalur fillimisht te Luka Modric, duke zbuluar se mesfushori kroat ishte një nga futbollistët që e kishte bindur personalisht për t’u bashkuar me Milanin.

Është e njëjta gjë që kam thënë edhe për Baggion dhe Guardiolën. Mjafton ta shohësh: çfarëdo që t’i kërkosh, qoftë një fotografi për një fëmijë apo një autograf, ai nuk thotë kurrë jo. Këto gjëra të bëjnë të kuptosh se përulësia është çelësi i çdo objektivi. Jam krenar që kam kontribuar në ardhjen e një lojtari të jashtëzakonshëm. Ai nuk humbi asnjë seancë stërvitore, përkundrazi, ishim ne ata që e ndalonim. Dashuria që ka për futbollin në atë moshë është vërtet për t’u admiruar”, deklaroi Tare.

Pesë transferime të bllokuara

Ish-drejtori sportiv i Milanit zbuloi gjithashtu emrat e pesë futbollistëve për të cilët kishte punuar dhe që synonte t’i sillte në Milano për sezonin 2026/2027. Mes tyre ishin Gila, Gonçalo Ramos, Doumbia, Valdepenas dhe Leon Goretzka.

“Gila dhe Gonçalo Ramos, kjo është e vërtetë. Po mendoja gjithashtu të merrja Doumbian, i cili më pas përfundoi te Sporting. Ishte lojtari im i preferuar dhe doja ta sillja në Milano me çdo kusht. Prisja vetëm të kishim më shumë qartësi për planet e ardhshme, por e kishim diskutuar që pas merkatos së janarit si një lojtar kyç.

Kisha siguruar pesë lojtarë: Gilan, Ramosin dhe Doumbian. Pastaj ishte Valdepenas, i cili përfundoi te Fiorentina. Kishim nevojë për një përzierje mes futbollistëve të rinj, me perspektivë të madhe për të ardhmen, dhe atyre që ishin gati të jepnin kontributin e tyre menjëherë. Emri i pestë ishte Goretzka”, tregoi shqiptari.

Tare: Leao e kishte mendjen te muzika dhe moda

Një pjesë e rëndësishme e intervistës iu kushtua edhe Rafael Leao-s. Tare nuk i kurseu vlerësimet për talentin portugez, por pranoi se pritshmëritë ndaj tij ishin shumë më të mëdha dhe se futbolli, sipas perceptimit të tij, nuk ishte më përparësia kryesore e sulmuesit.

“Është një djalë i jashtëzakonshëm, të cilin e kam dashur vërtet. Por ishte lojtari nga i cili të gjithë prisnim më shumë. Mendoj se futbolli nuk ishte më përparësia e tij kryesore. Më dukej se mendonte më shumë për jetën jashtë fushës: muzikën, modën…

Megjithatë, nuk e vura kurrë në dyshim lidhjen e tij me Milanin. Ai e donte këtë klub dhe vuante kur nuk arrinte të performonte. Kishte gjithashtu probleme fizike dhe shpesh luante sikur të kishte frenat e tërhequra.

U përpoqa të zhvilloja biseda individuale me të më shumë se me lojtarët e tjerë. Çdo herë largohesha me një ndjesi pozitive. Ndjeja se ai dëshironte të ndryshonte diçka, por ndonjëherë dëshira nuk mjafton. Për të nuk erdhi kurrë një ofertë konkrete”, përfundoi Tare.

Në fund, shqiptari vlerësoi edhe punën e përbashkët me drejtuesit e tjerë të klubit, Giorgio Furlani, Zlatan Ibrahimovic dhe Geoffrey Moncada. Sipas tij, Milani arriti të realizonte shitje të konsiderueshme, pavarësisht se në atë sezon nuk ishte pjesë e Champions League, ndërsa të ardhurat e krijuara mundësuan investime të reja në skuadër.