Plani amerikan për Gazën lejon Hamasin të mbajë armë të lehta

Një draft-plan amerikan për Gazën pas luftës parashikon që Hamasi të dorëzojë armët e afta për të goditur Izraelin, ndërsa në fazën fillestare do të lejohet të mbajë armë të lehta.
Lajmi është raportuar nga The New York Times, duke cituar burime të njohura me përmbajtjen e dokumentit.
Sipas raportimit, detajet e planit janë ende në diskutim dhe mund të ndryshojnë. Ende nuk është e qartë se si do të realizohet procesi i çmilitarizimit dhe kush do të marrë në dorëzim arsenalin që Hamasi do të dorëzojë.
Plani po hartohet nga një ekip që përfshin Jared Kushner, të dërguarin e posaçëm Steve Witkoff dhe diplomatin bullgar Nickolay Mladenov, i cili pritet të shërbejë si përfaqësues i lartë në Bordin e Paqes të iniciuar nga presidenti amerikan. Drafti pritet t’i paraqitet Hamasit në javët në vijim.
As Hamasi dhe as Benjamin Netanyahu nuk kanë komentuar mbi raportimin. Nga ana tjetër, zëdhënësi i Shtëpisë së Bardhë, Dylan Johnson, deklaroi për New York Times se administrata pret çarmatim të plotë të Hamasit si pjesë e planit me 20 pika të presidentit Donald Trump. Megjithatë, mbetet e paqartë se kush do të marrë kontrollin e armëve të dorëzuara dhe si do të zbatohet konkretisht procesi.

Sipas raportimit, Izraeli nuk pritet të tërheqë forcat e tij nga Gaza përpara se Hamasi dhe organizatat e tjera të armatosura të dorëzojnë armët. Pa çmilitarizim, Bordi i Paqes do ta ketë të vështirë të zbatojë planin 20-pikësh, i cili përfshin dislokimin e një force ndërkombëtare stabilizuese në Rripin e Gazës, rindërtim të gjerë dhe kalimin e administrimit të territorit tek një komitet teknokratësh.
Këto çështje pritet të diskutohen mes Netanyahut dhe Trump gjatë takimit të tyre në Washington.