Politike

Shqipëria, Ballkani, Evropa, lufta – Edi Rama zbërthehet për median malazeze

Kohë të vështira, të cilat bëhen edhe më të vështira – Ky ka qenë përkufizimi, të cilin kryeministri shqiptar, Edi Rama, e ka dhënë gjatë një interviste ekskluzive për median malazeze A Plus TV.

Duke e njëhsuar si “një fat të keq”, për çfarë po i ndodh radhazi kontinentit të vjetër, prej pandemisë e deri tek pasojat e luftës tashmë, ndër të cilat më e ndjeshmja, ajo e krizës energjetike.

“Më duhet të them se për ne në Ballkanin Perëndimor situata është edhe më e vështirë sepse fqinjët dhe miqtë tanë brenda Bashkimit Evropian kanë mundësi të përdorin paketa dhe fonde speciale për rimëkëmbje”, shprehet Rama.

Një pasthirrmë e njohur ndihme nga i gjithë rajoni karshi “vëllait të madh” kontinental, e përsiatur vijimësisht, me qëllim integrimin – edhe pse jo formal – faktik dhe funksional të gjashtë vendeve.

Me luftën nëpër këmbë, Evropa po lëviz më shpejt, jo thjesht për të “shpëtuar” fqinjin e vogël, por mbi të gjitha veten.

… LAJM I PERDITESUAR

Në një intervistë për median malazeze, A Plus TV, kryeministri Edi Rama është shprehur se bota po jeton në kohë të vështira, por përtej kësaj, është shprehur optimist sepse thotë se ka lajme të rëndësishme që vijnë nga Ballkani Perëndimor. Për kreun e qeverisë, Ballkani perëndimor ka një pozicion në arenën ndërkombëtare më të vlerësuar, duke theksuar se po punohet shumë fortë që ky rajon të mos jetë një vatër konfliktesh.

“Nuk do të jetë kurrë e lehtë dhe nuk pres që të bëhet më e lehtë. Mendoj se të gjithë duhet të përgatitemi për faktin se do të bëhet më e vështirë, sepse gjërat po ndërlikohen gjithnjë e më shumë në çdo front… Duhet të punojmë me zell, të përpiqemi të punojmë edhe më shumë, të mos humbasim besimin, jo për të vazhduar prej nga erdhëm. Ballkani, Ballkani Perëndimor nuk ka qenë kurrë në pozicion luftarak”, tha Rama.

Rama foli edhe për problemin e Kosovës, marrëveshjen e propozuar franko-gjermane mes Beogradit dhe Prishtinës si edhe marrëdhënien e tij me presidentin e Serbisë, Aleksandar Vuçiç. Ai tha se dialogu mes Kosovës dhe Serbisë, po ecën, ngadalë, por po bën përparim.

“E ndoqa deklaratën e fundit të presidentit Vuçiq nga Davos dhe mendoj se ishte mjaft e respektueshme duke pasur parasysh mënyrën se si ai shprehu nevojën për të ecur përpara. Sigurisht, në mënyrën e tij karakteristike shumë të veçantë të komunikimit, por tregoi respekt.

Ka edhe shumë sulme mes Presidentit të Serbisë dhe Kryeministrit të Kosovës, të cilat ndonjëherë janë edhe më të rënda. Imagjinoni nëse të gjithë do të shihnin vetëm bardh e zi dhe nëse të gjithë do të mbanin pozicionet e tyre dhe nëse askush nuk do të fliste me askënd. Gjërat nuk ishin më mirë. Pra, është gjithmonë më mirë të bisedoni me njerëzit, të përpiqeni të kuptoni arsyet, të paraqisni argumentet tuaja. Presidenti Vuçiç dhe unë kemi gjithmonë qëndrime shumë të forta, pikëpamje krejtësisht të ndryshme për çështjen e Kosovës, të cilën ai e quan Kosovë dhe Metohi. Për mua është shteti i lirë, demokratik, sovran i Kosovës. Mirëpo, nëse situata është e tillë për momentin, mendoj se ndërkohë gjërat, po përparojnë, gjërat po ndryshojnë. Gjërat po ecin në drejtimin e duhur. Ngadalë, por ata po lëvizin. Dikur nuk kishim komunikim dhe ishte e pamundur të imagjinohej që serbët dhe shqiptarët të ishin në të njëjtën tryezë. Pra, do të marrë kohë, do të marrë kohë, por kjo është në rregull”, komentoi Rama.

Rama e cilësoi veten si një politikan të veçantë në rajon dhe për të mbështetur këtë ide të tij dha edhe një shembull.

“Unë jam për shembull një mik shumë i mirë i Xhorx Soros dhe Rejep Tajip Erdogan, dhe ky është një nivel edhe më i lartë konflikti, le të themi është një duel global”, tha kryeministri.

Biseda u mbyll me një temë krejtësisht apolitike.

“Mali i Zi është i vogël, por është vend i artistëve të mëdhenj. Njëri prej tyre ishte shoku im shumë i dashur nga Tuzi, Leo Dokaj. Ai u nda nga jeta, por ruaj kujtime të mrekullueshme për të dhe falë tij e njoh më mirë skenën e artit malazez dhe historinë e tij të artit, që është e pabesueshme, vërtet e pabesueshme”, përfundoi Rama.

Rama foli edhe për projektin Open Balkan, tema ekonomike që lidhen me bashkëpunimin mes Shqipërisë dhe Malit të Zi si dhe vendeve të Ballkanit Perëndimor.

Politike

Kreu i PL e uroi për fitoren/ Presidentja e RMV falënderon Metën në shqip, ja çfarë shkruan për integrimin

Presidentja e sapozgjedhur e Maqedonisë së Veriut, Gordana Sijlanovska Davkova ka falënderuar Presidentin e Partisë së Lirisë, Ilir Meta për urimin që ky i fundit i shprehu pas fitores.

Davkova ka shprehur falënderimin e saj ndaj Metës në gjuhën shqipe në rrjetin social “X”, duke vlerësuar përpjekjet për përmirësimin e marrëdhënieve mes dy vendeve.

Ajo shtoi se pret që me të njëjtin entuziazëm të vijojë udhëtimi i dy vendeve drejt integrimit të plotë evropian.

“I nderuar President Meta,
Faleminderit për urimet dhe përpjekjet Tuaja të sinqerta për përmirësimin e marrëdhënieve maqedono-shqiptare.
Pres që me të njëjtin entuziazëm të fortë të vazhdojmë udhëtimin e dy vendeve tona drejt integrimit të plotë evropian”, shkroi ajo në “X”.

Politike

Debatet për amnistinë/ Bardhi në Kuvend: U liruan vetëm 4 zyrtarë për korrupsion, të tjerët i liroi GJKKO

Kreu i grupit parlamentar të Partisë Demokratike, Gazment Bardhi thotë nga Kuvendi se nga amnistia penale kanë përfituar vetëm 4 të dënuar për korrupsion, ndërsa të tjerët janë liruar nga gjykata. Bardhi thotë se i është drejtuar me një kërkesë për informacion Prokurorisë së Posaçme.

Fjala në Kuvend:

I shqetësuar nga lajmet e keqinterpretuar në media, se nga amnistia përfituan lirinë nga burgu “100 zyrtarë të korruptuar”, me datë 25 Prill 2024, i jam drejtuar zyrtarisht SPAK me një kërkesë për informacion. nDje jam informuar zyrtarisht nga drejtuesi i SPAK, të cilin dua ta falenderoj për korrektesën, nga ku më rezulton se e gjitha çka u pretendua edhe sot në mëngjes në këtë sallë është një gënjeshtër e madhe.

SPAK ka detajuar, shpjeguar dhe sqaruar, historinë e rreme se nga amnistia u liruan nga burgu apo përfituan ulje të kohës së qëndrimit në burg “100 zyrtarë të korruptuar”, një e pavërtetë e madhe, që fryhet/sajohet nga ata që as nuk kuptojnë çfarë lexojnë dhe as nuk duan të kuptojnë, por kanë vendosur të qëndrojnë deri në fund tek politika e gënjeshtrës së ditës: “bëjmë sikur themi diçka të pavërtetë, pa thënë asgjë në interes të qytetarëve” që të bëhemi lajm i ditës. Kush nuk prodhon dot politikë, e ka të vetmen rrugë gënjeshtrën për t’u bërë lajm. Kush nuk bën dot opozitë reale me qeverinë e Edi Ramës, e ka të vetmen rrugë sajimin e kauzave të rreme për t’u bërë lajm.

Nga sqarimi i SPAK rezulton e qartë se:

Asnjë subjekt i posaçëm i SPAK nuk ka përfituar nga Amnistia.
Asnjë procedim penal nën hetim nga SPAK apo proces gjyqësor i pa përfunduar me vendim të formës së prerë nuk ka përfituar nga Aministia.

Asnjë gjyqtar apo prokuror nuk ka qenë në burg në kohën e hyrjes në fuqi të Amnistisë dhe për pasojë nuk kishte sesi të përfitonte lirimin nga burgu.

Nga 18 vepra penale që janë në kompetencë të SPAK (nenet 244, 244/a, 245, 245/1, 257, 258, 259, 259/a, 260, 312, 319, 319/a, 319/b, 319/c, 319/ç, 319/d, 319/dh dhe 319/e) vetëm 1 vepër penale, pra personat e dënuar për veprën penale të parashikuar në nenin 245/1 “Ushtrimi i ndikimit të paligjshëm ndaj personave që ushtrojnë funksione publik”, kanë përfituar nga amnistia.

Statistikat e dhënë nga SPAK i referohen këtyre subjekteve, pra qytetarë që kanë qenë të dënuar për ushtrim të ndikimit të paligjshëm.

Nga e gjitha shifra e referuar nga SPAK lirimin nga burgu kanë përfituar vetëm 4 qytetarë, ndërkohë që pjesa tjetër nuk kanë qenë në burg, sepse janë liruar nga vetë GJKKO.

Politike

“PS nuk do hetim për sistemin TIMS”/ Salianji: Rama mban fjalime sa herë është i shqetësuar

Deputeti i PD dhe njëkohësisht kryetari i Komisionit Hetimor për sistemin TIMS Ervin Salianji, deklaroi se PS nuk e dëshiron një hetim për sistemin TIMS.

Salianji theksoi se Komisioni Hetimor për TIMS do ta ketë një produkt final. Në lidhje me fjalimin e Ramës përpara mbështetësve të PS-së, Salianji u shpreh se kryeministri mban fjalime sa herë që është i shqetësuar.

Ervin Salianji: Komisioni nuk ka ngërç. PS nuk do që të ketë Komision Hetimor. Ky Komision do të ketë një produkt. Deri më 5 qershor do të pyeten dëshmitarët. Arrestimi i drejtorit të IT në Policinë e Shtetit është produkt i Komisionit deri tani. Këtu të gjithë përgjigjen, vetëm Kryeministri jo.

Edi Rama e ka treguar se nuk mban marrëveshje. Rama me fjalimet e tij thotë se përveç meje, të gjithë janë të rrezikuar. Kryeministri mban fjalime të gjata sa herë që është i shqetësuar. Unë inkurajoj dhe mbështes SPAK. Ne kërkojmë që institucionet e drejtësisë të jenë të pavarura.

Politike

Berisha paraqitet në Parlament/ Reagojnë socialistët: Kjo është fyerje…

Pas një mungese te gjatë 4 mujore, për shkak të izolimit shtëpiak, sot Sali Berisha u shfaq krejt papritur në Parlament, por jo fizikisht.

Besnikërit e tij, kishin gjetur një mënyrë se si ta çonin liderin e tyre në Parlament i cili është i dënuar të mos zbresë shkallët e pallatit të tij duke rrezikuar në këtë mënyrë dhe mandatin.

Flamur Noka, Sorina Koti, Albana Vokshi ishin disa deputete që kishin zgjedhur të shkonin në seancë me bluzë që mbante të stampuar krahas fotografisë së Sali Berishës, edhe mbishkrimin: Lironi liderin e opozitës.

Kjo formë proteste e heshtur e demokratëve për liderin e izoluar nuk u prit mirë nga socialistët.

“Duket më shumë se qesharake që të jesh në Kuvend dhe të flasësh për luftën kundër korrupsionit, duke mbajtur në gjoks një person të akuzuar për korrupsion”, u shpreh ministri i Brendshëm Taulant Balla i cili i tërhoqi vëmendje kryetares së Kuvendit.

“Minimalisht, edhe një sugjerim në formë kritike për drejtuesit e Kuvendit. Kuvendi ka një kod etike, ku deputetët duhet ta respektojë dhe me veshjen. Do ta quaja fyerje prezencën e disave prej juve këtu. Jam i bindur se e bëni në shenjë mirënjohje sepse mendoni se ia keni borxh Saliut që jeni në këtë sallë. Ta veshësh Luan dhe ta vesh dhe mbi kokë. Por kursejani qytetarëve këtë. Dhe mund ta bëni çdo ditë poshtë ballkonit. Ju kam parë dhe te protestat tuaja te bashkia dhe nuk ia gjej kuptimin pse duhet të shkoni te bashkia me bluzat ‘lironi Saliun’”, shtoi Balla.

Politike

VMRO triumfoi në zgjedhje/ Begaj uron Presidenten e re Gordana Davkova: Jam i bindur se do të forcojmë marrëdhëniet mes vendeve tona

Presidenti i Republikës së Shqipërisë, Bajram Begaj, uroi sot Gordana Siljanovska-Davkovan për zgjedhjen në detyrën e Presidentes së Republikës së Maqedonisë së Veriut, si e para grua në krye të shtetit.

Presidenti Begaj në një postim në profilin e tij në rrjetin social X shpreh bindjen për forcimin e mëtejshëm të marrëdhënieve mes dy vendeve
Postimi i plotë i Presidentit të Republikës:

“Urime, Gordana Siljanovska-Davkova, e para grua e votuar si Presidente e RMV. Jam i bindur se së bashku do të forcojmë më tej marrëdhëniet tradicionalisht shumë të mira midis vendeve tona mike, si vende anëtare në NATO dhe anëtare të ardhshme në BE, për të cilën shqiptarët në RMV mbeten tërësisht të angazhuar”, shkroi Begaj.