Elon Musk shpërthen nga Firenca: Duam tregti të lirë me Europën, jo tarifa “Trump”

Miliarderi amerikan i teknologjisë, Elon Musk, tha të shtunën se shpresonte në të ardhmen të shihte lirinë e plotë të tregtisë midis Shteteve të Bashkuara dhe Evropës, duke folur disa ditë pasi presidenti i SHBA Donald Trump njoftoi tarifat ndaj partnerëve tregtarë.

Musk, një këshilltar i Trump-it i cili ka punuar për të eliminuar shpenzimet publike të kota të SHBA-së, foli përmes video-lidhjes në një kongres në Firence të Partisë së Ligës së krahut të djathtë të Italisë.

“Në fund të ditës, shpresoj se është rënë dakord që si Evropa ashtu edhe Shtetet e Bashkuara duhet të lëvizin në mënyrë ideale, sipas mendimit tim, drejt një situate tarifore zero, duke krijuar në mënyrë efektive një zonë të tregtisë së lirë midis Evropës dhe Amerikës së Veriut”, tha Musk.

Sipas planeve të Trump të shpallura të mërkurën, Italia, e cila ka një suficit të madh tregtar me Shtetet e Bashkuara, do t’i nënshtrohet një tarife të përgjithshme prej 20% së bashku me vendet e tjera të Bashkimit Evropian.

I intervistuar nga kreu i Ligës, Matteo Salvini, Musk, i cili ka shprehur vazhdimisht mbështetje për partitë e krahut të djathtë në të gjithë Evropën, tha se ai gjithashtu shpresonte të shihte një liri më të madhe lëvizjeje midis Evropës dhe Shteteve të Bashkuara.

“Nëse njerëzit dëshirojnë të punojnë në Evropë ose dëshirojnë të punojnë në Amerikën e Veriut, ata duhet të lejohen ta bëjnë këtë sipas mendimit tim”, tha Musk, duke shtuar se kjo “ka qenë sigurisht këshilla ime për presidentin”.

Musk, i cili ka qenë i afërt në të kaluarën me kryeministren e djathtë të Italisë, Giorgia Meloni dhe partinë e saj Vëllezërit e Italisë, ka shprehur gjithashtu mbështetje për Laga-n e Salvinit.

Të dy grupet kanë një axhendë të djathtë të bazuar në ligjin dhe rendin, uljen e taksave dhe goditjen e emigracionit të parregullt.

Ministri i Ekonomisë i Italisë, Giancarlo Giorgetti, i cili është nga Liga, tha më herët të shtunën se qeveria dëshironte “de-përshkallëzimin” me SHBA-në pas njoftimit të tarifave të Trump dhe paralajmëroi kundër vendosjes së tarifave hakmarrëse.