“Të vijojë lufta ndaj korrupsionit”/ Media amerikane: Si e gjen Eric Wendt Shqipërinë

Ambasadori i ri i Shteteve të Bashkuara në Shqipëri, gjeneral-lejtnant në pension Eric P. Wendt, është në fokus të një profili të publikuar nga media amerikane Contra Costa Herald. Wendt është nominuar nga presidenti Donald Trump më 13 prill 2026, ndërsa Senati amerikan e konfirmoi për këtë detyrë më 7 gusht. Më 19 gusht ai bëri betimin si ambasador i SHBA-së në Shqipëri.

Wendt pritet të nisë zyrtarisht detyrën në Tiranë pas paraqitjes së kredencialeve te Presidenti Bajram Begaj. Në deklaratat e bëra gjatë procesit të konfirmimit në Senat, ai e ka cilësuar Shqipërinë një partnere të rëndësishme të Shteteve të Bashkuara dhe një aleate të NATO-s.

Sipas profilit të publikuar nga Contra Costa Herald, në fokus të mandatit të tij pritet të jenë bashkëpunimi në fushën e sigurisë dhe mbrojtjes, mbështetja për luftën kundër korrupsionit dhe krimit të organizuar, forcimi i sigurisë kibernetike dhe zgjerimi i marrëdhënieve ekonomike e tregtare mes dy vendeve.

Eric Patrick Wendt ka lindur më 7 tetor 1964 në Berkeley të Kalifornisë dhe është rritur në Clayton, ku është diplomuar në Clayton Valley High School në vitin 1982. Ai ka shërbyer për më shumë se 34 vite në ushtrinë amerikane dhe ka arritur gradën gjeneral-lejtnant.

Detyra e tij e fundit ushtarake ishte drejtimi i Komandës së Forcave Speciale të NATO-s. Wendt mori komandën në nëntor 2019 dhe qëndroi në këtë funksion deri në daljen në pension në vitin 2021. Gjatë karrierës së tij ka shërbyer në Afganistan, Kore, Evropë dhe Lindjen e Mesme, ndërsa ka mbajtur edhe detyrën e koordinatorit të sigurisë së SHBA-së për Izraelin dhe Autoritetin Palestinez.

Në këtë funksion, sipas profilit të tij zyrtar, ai drejtoi një koalicion prej tetë shtetesh dhe raportonte te Sekretari amerikan i Shtetit.

Wendt ka përfunduar studimet universitare në University of California, Santa Barbara dhe masterin në Naval Postgraduate School. Ai flet arabisht dhe koreançe dhe gjatë karrierës së tij është vlerësuar me disa dekorata dhe medalje të ushtrisë amerikane.

Një element i veçantë i karrierës së tij lidhet edhe me Shqipërinë. Gjatë drejtimit të Komandës së Forcave Speciale të NATO-s, Wendt ka pasur kontakte me strukturat shqiptare të operacioneve speciale, në kuadër të bashkëpunimit të forcave aleate.

Emërimi në Shqipëri nuk është përvoja e tij e parë si kandidat për një post diplomatik. Në vitin 2020, administrata Trump e kishte nominuar Wendt për ambasador të SHBA-së në Katar, por procesi i konfirmimit nuk u përfundua para mbylljes së Kongresit të 116-të.

Pas daljes në pension nga ushtria, Wendt ka vijuar aktivitetin në fushën e sigurisë dhe arsimit, duke punuar si profesor praktike në Naval Postgraduate School dhe si këshilltar për Departamentin amerikan të Mbrojtjes në Kore.

Emërimi i tij vjen pas një periudhe pa një ambasador amerikan të konfirmuar me kohë të plotë në Tiranë, që prej përfundimit të mandatit të Yuri Kim në vitin 2023. Deri në marrjen e detyrës nga Wendt, ambasada është drejtuar nga të ngarkuar me punë dhe përfaqësues të përkohshëm.