Aktualitet
Sapo kishte festuar 40-vjetorin/ Ndahet nga jeta zyrtarja e AKSHI, kolegët mes lotësh
Lidjana Shahinaj, drejtuese e një njësie pranë Agjencisë Kombëtare për Kërkimin Shkencor dhe Inovacionin, është ndarë nga jeta në moshën 40-vjeçare.
Lajmi është bërë i ditur nga familjarët dhe kolegët e saj, të cilët kanë shprehur dhimbjen për humbjen e parakohshme. Përmes një reagimi në rrjetet sociale, motra e saj ka treguar se Lidjana sapo kishte festuar 40-vjetorin e lindjes, por fatkeqësisht, sipas saj, “zemra e tradhtoi”.
Edhe kolegët në Agjencinë Kombëtare për Kërkimin Shkencor dhe Inovacionin kanë ndarë një mesazh në kujtim të saj. Ata e përshkruajnë Shahinajn si një person me vlera të veçanta njerëzore, të dalluar për mirësinë, empatinë dhe gatishmërinë për të ndihmuar të tjerët.
Në mesazhin e tyre, kolegët vlerësojnë edhe kontributin e saj profesional, duke theksuar se ajo ishte ndër personat e parë që mbështeti risinë dhe vizionin e institucionit, të cilit iu përkushtua deri në fund.
“Do të mbetet gjithmonë një nga njerëzit me vlera të rralla njerëzore dhe me një kontribut të çmuar në institucion. Do të mbetet gjithmonë e paharruar mes nesh!”, thuhet në mesazhin e kolegëve.
