Aksidenti tragjik i merr jetën artistit të njohur, “Mjeshtri i Madh” i Ansamblit Mirdita

Një aksident tragjik i ndodhur mesditën e kësaj të shtune në aksin e vjetër Fushë-Krujë–Thumanë i ka marrë jetën 65-vjeçarit Paulin Filopati, një prej emrave të njohur të artit dhe folklorit tradicional mirditor.

Lajmi i hidhur ka shkaktuar dhimbje të madhe te familjarët, miqtë dhe komuniteti artistik, ku Filopati ishte vlerësuar ndër vite për kontributin e tij në ruajtjen dhe promovimin e traditës popullore.

Në momentin e aksidentit, pranë tij ndodhej edhe bashkëshortja, e cila fatmirësisht ka shpëtuar pa pësuar lëndime.

Paulin Filopati ishte pjesë e Grupit të Burrave të Ansamblit Mirdita, ku mbante titullin “Mjeshtër i Madh”, si dhe artist i Grupit Kthella. Ai ishte njëri prej tre vëllezërve Filopati, së bashku me Gjovalinin dhe Pashkun, të njohur për kontributin e tyre në muzikën dhe folklorin e zonës së Mirditës.

Lajmin e ndarjes së tij nga jeta e ka bërë të ditur edhe miku i tij, Gjergj Marku, i cili e ka kujtuar me fjalë prekëse, duke e cilësuar si një artist të dashur, shpirtbardhë dhe gjithmonë të qeshur.

“Na le dhimbje mbi trup e shpirt, artisti ynë i dashur, shpirtbardhë dhe i qeshur, Paulin Filopati!”, shkruan Marku në reagimin e tij.

Ai thekson se kjo është një humbje e rëndë jo vetëm për familjen dhe të afërmit, por edhe për gjithë komunitetin e artistëve të Mirditës, që humbën një prej përfaqësuesve të traditës së tyre kulturore.

Familja ka bërë të ditur se ceremonia mortore do të zhvillohet të hënën, më 16 nëntor 2026, në Katedralen e Rrëshenit, ndërsa varrimi do të mbahet në orën 12:00, në varrezat e Kodër Rrëshenit.

Ndarja e Paulin Filopatit nga jeta lë pas një boshllëk të madh te njerëzit që e njohën dhe te komuniteti artistik mirditor, ku ai do të kujtohet për kontributin dhe dashurinë ndaj folklorit tradicional.