Fifi mohon shtatzëninë e dytë: Djali im e ka një vëlla, nuk do tjetër

Këngëtarja Fifi ka reaguar ndaj lajmeve që qarkulluan së fundmi për një shtatzëni të dytë, duke mohuar kategorikisht se është në pritje të një fëmije tjetër.

E ftuar në emisionin “Goca dhe Gra”, artistja foli për jetën familjare dhe planet për të ardhmen, duke zbuluar se nuk dëshiron të zgjerojë më tej familjen. Ajo sqaroi se thashethemet për shtatzëninë kishin nisur pas publikimit të një videoje humoristike në TikTok.

Gjatë bisedës, Fifi u ndal edhe te përvoja e mëmësisë, duke pranuar se vetëm pasi u bë nënë arriti të kuptonte plotësisht peshën dhe përgjegjësinë që mbart kjo fjalë.

Këngëtarja foli hapur edhe për periudhën e vështirë pas lindjes, duke treguar se kishte kaluar një përjetim emocionalisht të ngarkuar, përfshirë depresionin post-partum.

“Nuk e kam ditur kuptimin e fjalës nënë derisa u bëra vetë nënë. Tani të gjithë njerëzit i shumëzoj me zero”, u shpreh ajo.

Fifi tregoi se një moment i rëndësishëm reflektimi për të ishte koha kur djali nisi të fliste dhe të përsëriste shprehje që dëgjonte nga të rriturit. Kjo e bëri të kuptonte se tashmë duhej të ishte një model për të birin.

“Duhet të jesh një shembull për këtë të voglin që po rritet dhe nëse unë nuk jam shembull, atëherë…”, rrëfeu këngëtarja.

Megjithatë, ajo theksoi se ndryshimi i saj si nënë nuk do të thotë se do të heqë dorë nga karakteri i drejtpërdrejtë dhe sinqeriteti që e kanë karakterizuar gjithmonë.

Një pjesë e intervistës iu kushtua edhe marrëdhënies me bashkëshortin, Adisin. Fifi u shpreh se ardhja në jetë e djalit ka ndikuar edhe në mënyrën se si e sheh dhe e vlerëson partnerin e saj.

Ajo pranoi se, si çdo çift, kanë debatet dhe mosmarrëveshjet e tyre, por theksoi se ndihet me fat që ka në krah një njeri që e mbështet në jetën personale dhe profesionale.

“Unë jam e lumtur që e kam një njeri si ai në krah, sepse është krenar për punën time dhe për atë që bëj. Jam e lumtur që kam një njeri mbështetës si ai, një njeri që rrallë mund ta ketë një artist”, u shpreh Fifi.

Përmes këtij rrëfimi, këngëtarja ndau me publikun një anë më personale të jetës së saj, duke folur për sfidat e mëmësisë, ndryshimet emocionale pas lindjes dhe rëndësinë e mbështetjes nga partneri.