Plani per shitjen e aksioneve/ Infantino nën presion nga Europa dhe Azia

Presidenti i FIFA-s, Gianni Infantino, po përballet me kundërshtime të forta pas planit për përfshirjen e investitorëve privatë në garat e organizatës, një ide që ka shkaktuar përplasje me disa prej konfederatave më të rëndësishme të futbollit botëror.

Kryebashkiaku i Mançesterit, Andy Burnham, e ka cilësuar Infantinon si “njeriun e gabuar” për të drejtuar FIFA-n, ndërsa Konfederata Aziatike e Futbollit (AFC) i është bashkuar kundërshtimeve të UEFA-s dhe CONCACAF-it ndaj kësaj nisme.

Sipas kundërshtarëve të projektit, shitja e aksioneve në kompeticionet e FIFA-s te investitorë privatë mund të dëmtojë strukturën tradicionale të futbollit dhe të ndikojë në mënyrën e menaxhimit të garave më të rëndësishme ndërkombëtare.

Burnham deklaroi se vetë fakti që një ide e tillë është vendosur në diskutim tregon, sipas tij, se Infantino nuk është personi i duhur për të udhëhequr organizatën më të madhe të futbollit në botë.

Edhe AFC ka shprehur shqetësime për mënyrën e ndjekjes së këtij procesi, duke argumentuar se vendime të tilla kërkojnë një konsultim të gjerë me të gjitha konfederatat dhe federatat anëtare. Organizata aziatike theksoi se Kupa e Botës ka vlerën e saj pikërisht për shkak të përfshirjes së të gjitha vendeve dhe komuniteteve të futbollit.

Kriza u thellua edhe më tej pas dorëheqjes së Carlos Cordeiro, këshilltarit të lartë të Infantinos për strategjinë dhe qeverisjen globale. Cordeiro e kundërshtoi publikisht planin, duke e cilësuar atë si një marrëveshje që nuk i shërben interesave afatgjata të futbollit.

Sipas tij, misioni i FIFA-s nuk duhet të jetë vetëm rritja e të ardhurave, por mbrojtja dhe zhvillimi i sportit për brezat e ardhshëm.

Debati për të ardhmen financiare të FIFA-s pritet të vazhdojë, ndërsa presioni ndaj Infantinos rritet nga brenda dhe jashtë organizatës.