Infantino dorëzohet përballë presionit, heq dorë nga plani i shitjes së aksioneve

Presidenti i FIFA-s, Gianni Infantino, ka vendosur të tërhiqet nga plani kontrovers për shitjen e aksioneve të disa prej garave më të rëndësishme të organizatës, pas kundërshtimeve të forta nga federatat kombëtare dhe konfederatat rajonale.

Infantino deklaroi se propozimi kishte krijuar përçarje brenda botës së futbollit dhe se kjo nuk përputhej më me objektivin fillestar të projektit.

“Ky propozim nuk do të vazhdojë”, tha kreu i FIFA-s, duke konfirmuar mbylljen e nismës për investime private në turnetë e organizatës, përfshirë edhe Kupën e Botës.

Sipas planit të prezantuar më herët, Infantino kishte premtuar një financim prej 40 milionë dollarësh për secilën nga 211 federatat anëtare të FIFA-s, në këmbim të mbështetjes për përfshirjen e investitorëve privatë në garat kryesore.

Por ideja u përball me rezistencë të madhe, veçanërisht nga UEFA, ku 55 federatat anëtare votuan për të bojkotuar Kupën e Botës në rast se projekti do të vazhdonte.

Tërheqja e FIFA-s u përshëndet edhe nga presidenti i Konfederatës Aziatike të Futbollit, Shaikh Salman bin Ebrahim Al Khalifa, i cili theksoi se e ardhmja e futbollit duhet të ndërtohet përmes dialogut dhe konsultimeve mes strukturave drejtuese.

Ndërkohë, drejtori operativ i FIFA-s, Kevin Lamour, deklaroi se administrata e organizatës ishte mashtruar në lidhje me disa elementë të projektit, duke shtuar më shumë pikëpyetje mbi mënyrën e hartimit të nismës.

Vendimi i Infantinos shënon një tërheqje të rëndësishme përballë presionit të federatave dhe rrezikut të një përplasjeje të madhe institucionale në futbollin botëror.