Bomba e Belind Këlliçit në ditën e 100: Rama sot më i dobët, Berisha do triumfojë

100 ditë protesta dhe rezistencë kundër qeverisë. Belind Këlliçi e cilëson këtë periudhë si një nga lëvizjet më të fuqishme të shoqërisë shqiptare kundër korrupsionit dhe qeverisjes së Edi Ramës.

Në një postim në rrjetet sociale, Këlliçi deklaron se protestat kanë sjellë, sipas tij, një ndryshim të rëndësishëm në shoqëri, duke bërë qytetarët më të guximshëm dhe më të vendosur për të kërkuar të drejtat e tyre.

Sipas Këlliçit, pas 100 ditësh rezistencë, “qytetari është më i fortë, ndërsa autokrati më i dobët”.

Ai akuzoi kryeministrin Rama për korrupsion dhe lidhje me krimin, duke pretenduar se protestat kanë rrëzuar propagandën qeveritare dhe kanë nxjerrë në pah atë që ai e quan realitetin e pushtetit.

Këlliçi thotë gjithashtu se kërkesa për largimin e Ramës nga pushteti mbetet e pandryshuar, ndërsa protestat, sipas tij, kanë rikthyer në qendër të vëmendjes çështje si korrupsioni, varfëria, çmimet, shëndetësia dhe përgjegjësia e institucioneve të drejtësisë.

Një pjesë të rëndësishme të deklaratës ia kushton edhe SPAK-ut. Këlliçi thotë se protestuesit po kërkojnë që drejtësia e re të hetojë Edi Ramën dhe aferat që opozita i atribuon qeverisë.

Këlliçi e cilëson si sukses për opozitën faktin që, sipas tij, denoncimet e Partisë Demokratike po gjejnë gjithnjë e më shumë jehonë në protestat qytetare.

Në fund, ai vlerëson veçanërisht mbështetjen e diasporës shqiptare në Shtetet e Bashkuara dhe Europë, duke e cilësuar atë si jetike për lëvizjen.

“Kauza e drejtë do triumfojë”, shkruan Këlliçi, duke paralajmëruar vijimin e protestave dhe rezistencës opozitare.