SHBA vazhdon sulmet ndaj Iranit, rriten shqetësimet për sigurinë në Ngushticën e Hormuzit

SHBA ndërmori ditën e sotme një valë të re sulmesh ndaj Iranit, për të nëntën ditë radhazi, ndërsa shqetësimet për sigurinë e transportit detar në Ngushticën e Hormuzit u shtuan pasi Teherani njoftoi se dy anije cisternë kishin shpërthyer dhe kishin mbetur të palëvizshme.

Komanda Qendrore e SHBA-së (CENTCOM) deklaroi se operacioni i ri synon të dobësojë aftësinë e Iranit për të kryer sulme ndaj anijeve tregtare që kalojnë në këtë korridor strategjik detar. Autoritetet amerikane nuk dhanë detaje të mëtejshme mbi objektivat e goditura.

Sipas njoftimit, sulmet janë pjesë e përshkallëzimit të përplasjes mes SHBA-së dhe Iranit, pasi armëpushimi i përkohshëm i arritur një muaj më parë dështoi. Konflikti për kontrollin e Ngushticës së Hormuzit ka ndikuar në furnizimet globale me energji dhe ka shtuar shqetësimet për ndikimin në ekonominë botërore.

Agjencia gjysmëzyrtare iraniane e lajmeve Tasnim raportoi se raketat amerikane goditën disa qytete iraniane në orët e para të së hënës. Sipas saj, shpërthime u dëgjuan në Tabriz, Chabahar, Konarak, Bandar Mahshahr dhe Bandar Imam Khomeini.

Sekretari amerikan i Shtetit, Marco Rubio, deklaroi se SHBA do të vazhdojë operacionet ushtarake për aq kohë sa, sipas tij, Irani vijon të sulmojë anijet tregtare në Ngushticën e Hormuzit.

“Ngushtica e Hormuzit është një rrugë ujore ndërkombëtare dhe ato vazhdojnë të sulmojnë anijet në atë rrugë ujore ndërkombëtare. Për sa kohë që Irani këmbëngul në kontrollin e një rruge ujore ndërkombëtare, ne do të duhet t’i përgjigjemi kësaj. Shtetet e Bashkuara mbeten gjithmonë të hapura për një zgjidhje diplomatike”, tha Rubio.

Më herët, televizioni shtetëror iranian raportoi se Irani kishte kryer sulme me dronë ndaj aseteve dhe pajisjeve ushtarake amerikane në kampin Al-Adiri të Kuvajtit dhe në bazën ajrore Ali Al Salem.