Bota
Tre fuqitë bashkojnë firmat/ Nga nafta te OKB, këto janë 4 pikat e marrëveshjes
Trump, Putin dhe Xi Jinping në një deklaratë të përbashkët për paqen botërore. Tre liderët kanë miratuar në përfundim të samitit trepalësh në Shenzhen të Kinës një dokument që parashikon angazhime për uljen e rreziqeve bërthamore, bashkëpunimin energjetik, reformimin e OKB-së dhe çështjen e imunitetit të zyrtarëve shtetërorë.
“Një luftë bërthamore nuk mund të fitohet dhe nuk duhet të ndodhë kurrë”, thuhet në mesazhin kryesor të deklaratës, e cila është publikuar në faqen zyrtare të Kremlinit dhe transmetuar nga televizioni shtetëror kinez CCTV.
Në dokument, Shtetet e Bashkuara, Rusia dhe Kina angazhohen të zhvillojnë dialog për reduktimin e rreziqeve bërthamore dhe parandalimin e përhapjes së armëve të shkatërrimit në masë. Ky qëndrim vjen në një kohë kur rivalitetet mes fuqive të mëdha dhe tensionet ndërkombëtare kanë rikthyer shqetësimet për sigurinë globale.
Por marrëveshja e deklaruar nuk kufizohet vetëm te çështjet e sigurisë. Tre vendet shprehin gatishmërinë për të bashkëpunuar edhe në sektorin e naftës dhe energjisë, duke synuar rritjen e prodhimit dhe garantimin e furnizimeve të qëndrueshme për tregjet ndërkombëtare.
Një tjetër pikë e rëndësishme lidhet me reformimin e Organizatës së Kombeve të Bashkuara. Si anëtarë të përhershëm të Këshillit të Sigurimit, tre fuqitë shprehen të gatshme të angazhohen për ndryshime që, sipas tyre, do ta ndihmonin organizatën të përballonte më mirë sfidat globale dhe të përmbushte misionin e saj për ruajtjen e paqes.
Vëmendje të veçantë merr edhe qëndrimi për Gjykatën Penale Ndërkombëtare. Në deklaratë theksohet rëndësia e respektimit të imunitetit të zyrtarëve shtetërorë dhe parimit të pëlqimit të shteteve. Tre liderët paralajmërojnë kundër asaj që e cilësojnë si abuzim me juridiksionin nga Gjykata Penale Ndërkombëtare dhe institucione të ngjashme.
Kështu, dokumenti i miratuar në Shenzhen përfshin çështje që shkojnë përtej çarmatimit bërthamor, duke prekur edhe energjinë, rendin ndërkombëtar dhe kufijtë e juridiksionit të institucioneve ndërkombëtare.