Teherani konfirmon: Sanksionet në tryezën e negociatave

Marrëveshja mes Shteteve të Bashkuara dhe Iranit për t’i dhënë fund konfliktit që ka tronditur Lindjen e Mesme po hyn në një fazë vendimtare, ndërsa nga Teherani kanë ardhur sinjale të reja mbi përmbajtjen e paktit dhe paralajmërime të drejtpërdrejta ndaj Izraelit.

Komanda e Përbashkët e Forcave të Armatosura të Iranit deklaroi se Izraeli duhet të presë një “përgjigje të ashpër” nëse vazhdon sulmet në jug të Libanit, një zhvillim që vjen në kohën kur po finalizohen detajet e memorandumit të mirëkuptimit mes Uashingtonit dhe Teheranit.

Paralelisht, ministri i Jashtëm iranian, Abbas Araghchi, konfirmoi se marrëveshja përfundimtare me Shtetet e Bashkuara do të përfshijë dy çështje kyçe: programin bërthamor iranian dhe heqjen e sanksioneve ekonomike.

“Çështja bërthamore dhe heqja e sanksioneve do të jenë pjesë e marrëveshjes përfundimtare”, deklaroi Araghchi.

Sipas raportimit, pakti parashikon gjithashtu rihapjen e plotë të Ngushticës së Hormuzit për trafikun detar, një armëpushim të përhershëm në Liban, si dhe ruajtjen e status quo-së së programit bërthamor iranian deri në arritjen e një marrëveshjeje finale.

Al Arabiya raportoi gjithashtu se marrëveshja mund të përfshijë deri në 300 miliardë dollarë fonde për rindërtimin e Iranit pas luftës.

Zhvillimet vijnë vetëm një ditë pasi presidenti amerikan Donald Trump deklaroi se marrëveshja është “e gjitha e nënshkruar”, duke shtuar se Irani nuk do të zotërojë armë bërthamore dhe se Ngushtica e Hormuzit do të rihapet plotësisht.

Megjithatë, një nga pikat më të ndjeshme mbetet Libani. Paralajmërimi i Iranit ndaj Izraelit vjen në një moment kur kryeministri izraelit Benjamin Netanyahu ka bërë të qartë se ushtria izraelite nuk ka ndërmend të tërhiqet nga zonat tampon në Libanin jugor dhe do të vazhdojë operacionet kundër Hezbollahut.