Arrestimi i Vlora Hysenit, zbulohet kush e merr tani drejtimin e SHISH

Pas largimit të Vlora Hysenit nga drejtimi i Shërbimit Informativ Shtetëror, është përcaktuar edhe drejtuesi që do të ushtrojë përkohësisht kompetencat në krye të institucionit. Sipas raportimeve në media, detyra i është deleguar Elvis Lilës, i cili do të drejtojë përkohësisht SHISH-in pas pezullimit të Hysenit nga detyra.

Ndryshimi në drejtimin e institucionit vjen në një moment të rëndësishëm për SHISH-in, pas vendimit të Gjykatës së Posaçme për masën e sigurisë ndaj Vlora Hysenit. SPAK njoftoi se ndaj saj është caktuar masa “arrest në shtëpi”, ndërsa ajo është pezulluar nga ushtrimi i funksionit.

Pas njoftimit për masën e sigurisë, Hyseni u kthye në rajon dhe iu dorëzua autoriteteve. Ajo mbërriti fillimisht në aeroportin e Prishtinës, ku u paraqit pranë autoriteteve të Kosovës.

Më pas, Hyseni u transferua drejt pikës kufitare të Vërmicës, ku iu dorëzua autoriteteve shqiptare për vijimin e procedurave ligjore. Nga aty, ajo u shoqërua drejt Tiranës me një automjet civil të autoriteteve shqiptare, për ekzekutimin e masës së arrestit në shtëpi.

Ndërkohë, në krye të SHISH-it, kompetencat do të ushtrohen përkohësisht nga Elvis Lila. Vendimi vjen ndërsa hetimi ndaj Hysenit vijon dhe pritet të përcaktojë edhe hapat e mëtejshëm institucionalë për drejtimin e Shërbimit Informativ Shtetëror.