Rajon
Goditje politike për Vuçiçin nga Brukseli, SNS rrezikon përjashtimin nga EPP
Partia Popullore Evropiane (EPP) ka propozuar pezullimin e Partisë Përparimtare Serbe (SNS), të lidhur me presidentin Aleksandar Vuçiç, për shkak të shqetësimeve mbi respektimin e standardeve demokratike dhe qëndrimet e saj politike. Propozimi pritet të shqyrtohet në Asamblenë Politike të EPP-së, më 7 dhe 8 dhjetor në Bruksel.
Nëse miratohet, SNS do të humbasë përkohësisht të drejtat që gëzon si anëtare e kësaj familjeje politike evropiane, përfshirë të drejtën e votës. Sipas raportimeve të medias kroate “Večernji list”, partisë serbe do t’i jepet një afat njëvjeçar për të përmbushur shtatë kushte, në të kundërt mund të përballet me përjashtimin e plotë. SNS është anëtare e EPP-së që prej vitit 2016.
Ndër kërkesat e raportuara janë distancimi nga trashëgimia e politikës së Sllobodan Millosheviçit, ndalimi i glorifikimit të personave të dënuar për krime lufte dhe i mohimit të gjenocidit në Srebrenicë. Gjithashtu, EPP kërkon përafrimin e SNS-së me politikën e jashtme të Bashkimit Evropian dhe ndërprerjen e mbështetjes për politikat e presidentit rus Vladimir Putin.
EPP i kërkon gjithashtu partisë serbe të distancohet nga glorifikimi i Ratko Mlladiçit, ish-komandantit të Ushtrisë së Republikës Srpska, i dënuar me burgim të përjetshëm për gjenocidin në Srebrenicë dhe krime të tjera lufte. Varrimi i tij në Beograd, ku morën pjesë zyrtarë të lartë serbë, është përmendur si një nga zhvillimet që shtuan pakënaqësinë brenda familjes politike evropiane.
Shqetësimet e EPP-së përfshijnë edhe lirinë e medias, korrupsionin dhe lidhjet e dyshuara mes strukturave shtetërore dhe krimit të organizuar. Procesi i verifikimit të SNS-së nisi në shtator të vitit 2025 dhe zgjati më shumë se 14 muaj. Lista e plotë e shtatë kushteve nuk është bërë ende publike.
Propozimi është mirëpritur nga eurodeputeti kroat Karlo Ressler, drejtues i delegacionit të HDZ-së në Parlamentin Evropian. Ai ka deklaruar se EPP nuk mund të pajtohet me glorifikimin e kriminelëve të luftës, kërcënimet ndaj vendeve fqinje dhe mbështetjen për agresionin rus në Ukrainë.
Zhvillimi vjen pas zgjedhjeve të parakohshme parlamentare të 25 tetorit në Serbi, ku Lista Studentore doli fituese, duke i dhënë fund dominimit 14-vjeçar të SNS-së në pushtet. Kuvendi i ri u konstituua më 17 nëntor, ndërsa vendi ndodhet në procesin e formimit të qeverisë së re. Aleksandar Vuçiç, edhe pse nuk mban më zyrtarisht drejtimin e SNS-së, mbetet figura më me ndikim e kësaj force politike.