Neomalsorja kritika Ramës: Ndërsa shteti shqiptar flet për konsullatë, në Kosovë vazhdojnë të gjenden varre masive

Deputetja e pavarur Marjana Koçeku, e njohur si “Neomalsorja”, ka kundërshtuar nismën për hapjen e një konsullate serbe në Shkodër, duke e lidhur këtë çështje me zhvillimet e fundit në Zubin Potok, ku vijojnë kërkimet për trupat e shqiptarëve të vrarë gjatë luftës në Kosovë.

Në një reagim publik, Koçeku ka kritikuar faktin që ndërsa në Kosovë po vijojnë gërmimet për identifikimin e viktimave të luftës, në Shqipëri po diskutohet për zgjerimin e marrëdhënieve diplomatike me Serbinë.

Sipas saj, në Zubin Potok dyshohet për një varrezë masive ku mund të jenë të varrosur rreth 23 intelektualë shqiptarë të vrarë gjatë luftës, ndërsa deri tani janë gjetur trupat e disa prej viktimave. Ajo ka përmendur gjithashtu zbulimin e armatimit në zonë dhe arrestimin e një personi të dyshuar si ish-pjesëtar i Armatës Jugosllave.

Koçeku deklaron se hapja e një konsullate serbe në Shkodër nuk duhet të shihet vetëm nga këndvështrimi diplomatik dhe ekonomik, por duhet të merret parasysh edhe e kaluara historike mes shqiptarëve dhe Serbisë.

“Flitet për diplomaci, marrëdhënie bilaterale dhe përfitime ekonomike, por harrohet realiteti i një populli që ka kaluar një tragjedi”, është shprehur deputetja.

Ajo ka kritikuar edhe mënyrën e komunikimit të institucioneve shqiptare për këtë çështje, duke thënë se deri tani janë dhënë shpjegime të paqarta për hapjen e konsullatës.

Ndërkohë, Koçeku ka bërë të ditur se të dielën priten protesta në Shkodër kundër kësaj nisme, duke theksuar se çështja nuk mund të trajtohet si një vendim rutinë diplomatik.

Debati për hapjen e konsullatës serbe në Shkodër ka rikthyer në vëmendje diskutimet mbi marrëdhëniet Shqipëri-Serbi, proceset e pajtimit rajonal dhe trajtimin e pasojave të luftës në Kosovë.