Zvërneci/ Rama për Associated Press: Kushner kërkoi një shans për të investuar në Shqipëri

Kryeministri i Shqipërisë Edi Rama është zotuar që të mos heqë dorë nga investimi luksoz në Zvërnec të Vlorës, një investim i lidhur me dhëndrin e Presidentit të SHBA-së Donald Trump, Jared Kushner, pavarësisht protestave që kundërshtojnë projektin.
Në një intervistë me Associated Press, Rama i hodhi poshtë kundërshtimet për arsye mjedisore, të cilat sipas tij vijnë si rezultat i dezinformimit.
Rama tha se zhvillimi i vendit gjatë qeverisjes së tij po e kthen Shqipërinë nga një vend dikur të injoruar nga investitorët në një vend “ku kapitali i madh dëshiron të vijë dhe investitorët e mëdhenj duan të vijnë”.

Puna ka filluar tashmë për të pastruar tokën brenda një rezervati natyror të përdorur nga zogjtë shtegtarë, duke i bërë grupet mjedisore të paralajmërojnë për shkatërrimin e habitateve të ruajtura prej kohësh. Shqipëria ka 450 kilometra (280 milje) bregdet që mbeti kryesisht i pazhvilluar gjatë dekadave të sundimit të ashpër komunist.

Rama tha se një vlerësim formal i ndikimit në mjedis nuk ka filluar, sepse plani për zhvillimin nuk është finalizuar. Ai tha se arkitektët dhe specialistët ndërkombëtarë të mjedisit ende po e formësojnë propozimin.

“Kur bëhet fjalë për mjedisin, ende nuk ka asnjë projekt, ende nuk ka asnjë vlerësim të ndikimit në mjedis, sepse ky është ende një proces planifikimi”, tha ai.

Ai argumentoi se Shqipëria ka një rekord të fortë ruajtjeje të biodiversitetit, duke treguar ndalimin e gjuetisë dhe prerjes së pemëve që sipas tij ndihmuan popullatat e flamingove të rimëkëmben.

“Kemi dokumentacion fantastik se si jeta e egër në Shqipëri u rikthye falë moratoriumit 10-vjeçar të gjuetisë”, tha Rama.

Që nga fundi i majit, ekskavatorë dhe makineri të tjera të rënda kanë hyrë në zonën e planifikuar të zhvillimit, duke hapur rrugë hyrjeje, duke gërmuar në rërë, duke pastruar tokën midis pishave dhe duke instaluar gardhe.

Rama thotë se kritikat janë plot me “gjysmë të vërteta”.

Kryeministri sugjeroi se disa nga reagimet negative ndaj projektit po amplifikoheshin nga ndërhyrjet e jashtme, duke përmendur atë që ai e përshkroi si një fushatë kibernetike iraniane të gjatë kundër Shqipërisë.

Shqipëria e ka akuzuar prej kohësh Iranin për mbështetjen e hakerave që sulmojnë infrastrukturën kibernetike të vendit, pasi Shqipëria strehoi anëtarë të një grupi opozitar iranian. Teherani i ka mohuar akuzat.

“Ka shumë manipulime. Ka shumë gjysmë të vërteta që bëhen gënjeshtra gjithnjë e më të mëdha çdo orë”, tha ai.

Ai theksoi se nuk po akuzonte protestues individualë se vepronin si agjentë të huaj.